QR Ulttyq ekonomika ministrliginiń Ekonomikalyq zertteýler institýty Makroekonomikalyq zertteýler men boljamdar ortalyǵynyń direktorynyń mindetin atqarýshy Qýanysh Beisenǵazin mundaidyń álemdik baǵasynyń quldyraýy jóninde pikir bildirdi, dep habarlaidy QazAqparat.
«Munaidyń baǵasy keshe 30 dollarǵa deiin tómendep, búgin 36 dollarǵa qaita kóterildi. Bul jaǵdaidy qysqamerzimdi quldyraý dep sanaimyz. Sebebi, bul quldyraýdyń artynda eshqandai makroekonomikalyq nemese daǵdarystyq jaǵdai emes, OPEK+ aiasyndaǵy Saýd Arabiiasy men Reseidiń kelispeýshilikteri tur. OPEK+ quramyndaǵy jáne oǵan kirmeitin elder arnaiy ýaǵdalastyqpen osy jyly munai óndirisin azaitýy qajet edi. Joǵaryda atap ótkendei, bul quldyraýdy qysqamerzimdi dep sanaimyz. Sebebi munaidyń tómen baǵasy ne Reseige, ne Saýd Arabiiasyna tiimdi emes. Sol sebepti, jaqyn arada bul másele boiynsha bir mámilege keledi dep oilaimyz», - dedi sarapshy óz jaýabynda.
Onyń aitýynsha, munai baǵasynyń qulaýy Qazaqstan úshin tosyn bolǵan joq.
«Sebebi, onyń aldynda koronavirýstyń órshýi, Qytai tarapynan munaiǵa suranystyń azaiýy boiynsha sanaýlar júrgizilip, shekara jabylǵan jaǵdaida, pandemiia óskende qandai sharalar qoldaný qajettigi pysyqtalyp, daǵdarysqa qarsy baǵdarlama daiyndalǵan bolatyn. Sol sebepti, bizdiń memleket tarapynan qoldanylatyn sharalar kesheni bar. Ulttyq bank pen Úkimet málimdeme jasady. Sondyqtan, úrei men qorqynyshqa negiz joq», - dedi Q. Beisenǵazin.
