QR Premer-Ministri Asqar Mamin Qaraǵandy oblysynyń Saran qalasynda avtobýstar, elektrobýstar men arnaiy tehnika shyǵaratyn «QazTehna» zaýytynyń ashylý rásimine qatysty, dep habarlaidy "Ult aqparat".
Úkimettiń baspasóz qyzmetiniń habarlaýynsha, kásiporyn álemdegi asa iri avtobýs óndirýshi «Yutong» kompaniiasymen seriktestikte qurylǵan. Jobanyń quny shamamen 23 mlrd teńgeni quraidy, myńnan astam jańa jumys orny qurylady.
Jyldyq jobalyq qýaty – 1200 avtobýs pen elektrobýs, sondai-aq 500 birlik arnaiy tehnika.
Zaýytta birneshe óndiristik tsikldardy: dánekerleýdi, boiaýdy, quraýyshtardy shyǵarýdy, zertteý ortalyǵyn, sondai-aq tehnikany synaý jáne tekserýge arnalǵan trekti iske qosý qarastyrylǵan.
«Yutong» markaly avtobýstar barlyq kontinentte 30-dan astam elde paidalanylady. Tehnika qoǵamdyq tasymaldaý salasyndaǵy barlyq álemdik sapa standarttaryna sáikes keledi. Avtobýstar múmkindigi shekteýli jandarǵa arnalǵan arnaiy pandýstarmen, oryndarmen, elektrondy bilet berý jáne baqylaý júiesimen jabdyqtalǵan.
Jańa joba Qaraǵandy oblysynyń ekonomikasynyń damýyna jáne otandyq avtobýstarmen qoǵamdyq kólikti jańartý jáne jańǵyrtý baǵdarlamasyn iske asyrýǵa serpin beredi.
Úkimet basshysyna Saran qalasyndaǵy indýstriialyq aimaqty odan ári damytý perspektivasy, sondai-aq «Ońai» elektrondy bilettendirý júiesi týraly baiandaldy.
Jumys sapary aiasynda Úkimet basshysy sonymen qatar TMD-daǵy birden-bir «Caterpillar» markaly arnaiy tehnika servisiniń jáne aýyr tehnika komponentterin qalpyna keltirýdiń tolyq tsikli bar «Borýsan Makina Qazaqstan» JShS-ynda boldy.
