Almatyda rýhani-adamgershilik damý máselelerine arnalǵan halyqaralyq pedagogikalyq forým óz jumysyn bastady. Úsh kúnge sozylatyn jiynǵa shetel jáne otandyq ǵalym, ustazdar qatysýda. Sharada bala tárbiesi, muǵalimniń qoǵamdaǵy róli, adamzattyń jan tynyshtyǵy siiaqty máseleler sóz boldy. "Ózin-ózi taný" pániniń negizin qalaýshy Sara Nazarbaeva forýmǵa arnaiy kelip, "Bóbek" qoryn 20 jyl tolýymen quttyqtady, dep habarlaidy "Ult aqparat" Almaty arnasyna silteme jasap.
"Bizdiń aldymyzda óskeleń urpaqty shynaiylyqqa, meiirimdilik pen súiispenshilikke tárbieleý missiiasy tur. Barlyǵyńyzdy adam qundylyqtaryn basty baǵyt etken "Ózin-ózi taný" iliminiń 20 jyldyǵymen quttyqtaimyn. Adamgershilikke baýlyp, meiirimdilik jasaýǵa óz úlesin qosyp júrgen ǵalym, pedagogtarǵa, ádiskerlerge, "Bóbektiń" bastamalaryn qoldaýshylarǵa shynaiy alǵys aitamyn", - dedi "Bóbek" respýblikalyq balalar qaiyrymdylyq qorynyń prezidenti Sara Nazarbaeva.
"Bóbek" ortalyǵy jumysyn bastaǵaly beri onyń quramynda gýmanitarly kolledj, gimnaziia, "Ózin-ózi taný" balabaqshasy men astronomiialyq observatoriia jumys isteidi. Bul bilim ordalarynan túlegen jastar ómirdiń kez kelgen salasynda óz ornyn taýyp úlgergen. Muǵalimderge de jaǵdai jasalyp, olardyń kásibiligin joǵarylatýǵa airyqsha kóńil bólingen. Qordyń mereitoiyn quttyqtaýǵa qala ákimi Baýyrjan Baibek kelip, ortalyqtyń bilim salasyna qosqan úlesin atap ótti.
"Bóbek" ortalyǵy ózin-ózi taný baǵdarlamasyn júzege asyryp kele jatqan jańa sipattaǵy bilim berý besigi ekendigi barshamyzǵa belgeli. Osy ýaqyttyń ishinde zamanaýi tásilderdi igergen ortalyq ujymy balalardy jalpy adamdyq qundylyqtarmen sýsyndata otyryp, eliniń patrioty bolýǵa tárbieleýde eleýli tabystarǵa qol jetkizdi", - dedi Almaty qalasynyń ákimi Baýyrjan Baibek.
"20 jylda "Bóbek" ortalyǵy óskeleń urpaqtyń rýhani adamgershilik mádenietin damytýǵa, bilim berý salasynda adami qasietti oqyp úirenýge kóp jaǵdai jasady. Balalarǵa jáne qoldaý qajet etetin jandarǵa kómek kórsetip, qorǵan boldy", - dedi QR Bilim jáne ǵylym ministri Erlan Saǵadiev.
