Mádeniet jáne sport ministrligi Sport jáne dene shynyqtyrý isteri komitetiniń tóraǵasy Serik Sápiev Tokio Olimpiadasynda medal kútetin sportshylardy atady, dep habarlaidy "Ult aqparat".
«Álbette, ótken jazǵy Olimpiada oiyndarynda (Rio) medal alǵan sportshylardan úmit kútemiz. Máselen, qazirdiń ózinde Olga Rypakova men Dmitrii Balandinde litsenziia bar. Olardyń kórsetkishteri jaqsy ekenin qazir túsinip otyrmyz. Jekpe-jek túrlerinen, bokstan medaldi kóptep alarmyz degen úmit bar. Kúresten Álem chempionatynyń qorytyndysyn jasadyq. ÁCh-dan kúres boiynsha medal alǵandardan da júlde kútemiz. Bokstan litsenziialyq Álem chempionaty kelesi jyly aqpanda ótedi. Naqty esimin ata deseńizder, kúres túrlerinen Nurislam Sanaev pen Meirambek Ainaǵulovtyń baby jaqsy. Sporttyq quzǵa órmeleýden Rishat Haibýllin de jaqsy nátije kórsetti. Odan ósim kútemiz», - dedi Serik Sápiev búgin Ortalyq kommýnikatsiialar qyzmetinde ótken baspasóz máslihatynda.
Sport jáne dene shynyqtyrý isteri komitetiniń tóraǵasy boksshylardan Abylaihan Júsipovten, Vasilii Levitten, Qamshybek Qońqabaevtan, Bekzat Nurdáýletovten, Qairat Eralievten medal kútetinin jetkizdi.
«Osy boksshylar litsenziialyq týrnirlerge barady», - dedi ol.
Aita ketsek, 2020 jyly Japoniia astanasynda ótetin jazǵy Olimpiada oiyndaryna Ulttyq qurama enshisinde ázirge sporttyń 14 túrinen 25 litsenziia bar.
