Búgin Májilistiń jalpy otyrysynda Aýyl sharýashylyǵy ministri Saparhan Omarov jer qatynastary máseleleri týraly zań jobasyn talqylaý kezinde elimizde qansha jer alqaby sheteldikterge jalǵa berilgenin naqtylady, dep habarlaidy QazAqparat.
«Zań jobasyna sáikes, 2016 jylǵy 1 shildege deiin, iaǵni moratorii engizilgenge deiin berilgen aýyl sharýashylyǵy maqsatyndaǵy jer ýchaskelerine ýaqytsha jer paidalaný quqyǵy sheteldik jer paidalanýshylarǵa, sheteldik qatysý úlesi bar birlesken kásiporyndarǵa jáne qandastarǵa jaldaý merzimi aiaqtalǵanǵa deiin qoldanylady ári uzartylýǵa jatpaidy. Osyndai adamdardyń sany jáne olar ielenetin aýyl sharýashylyǵy jerleriniń alańdary týraly derekter bar ma, sondai-aq olardyń jaldaý merzimi qashan aiaqtalady», - dep surady depýtat Fahriddin Qarataev.
Óz kezeginde Aýyl sharýashylyǵy ministri Saparhan Omarov mundai jerler qazirgi kezde Qazaqstanda bar ekenin aitty.
«Atap aitqanda, 74,4 myń gektar aýyl sharýashylyǵy jeri 7 birikken kásiporynǵa jalǵa berilgen. Odan basqa eki sheteldik zańdy tulǵa 18,5 myń gektar jerdi búgingi kúni jalǵa alyp otyr. Bulardyń barlyǵy moratorii engizilgenge deiingi alynǵan jerler. Olardyń jalǵa alý merzimi 2022 jyldan 2025 jylǵa deiin. Osy ýaqyt ótkennen keiin bul jerlerdiń barlyǵy memleketke qaitarylady», - dedi S. Omarov.
Budan buryn habarlanǵandai, búgin Parlament májilisiniń jalpy otyrysynda «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrý engizý týraly» zań jobasy birinshi oqylymda maquldandy.
Zań jobasymen aýyl sharýashylyǵy jerlerin sheteldikterge jáne sheteldik kompaniialarǵa, sheteldik úlesi bar qazaqstandyq kompaniialarǵa, azamattyǵy joq adamdarǵa, halyqaralyq qatysýy bar ǵylymi ortalyqtarǵa, sondai-aq qandastarǵa berýge tolyq tyiym salý kózdelgen. Sonymen qatar, zań jobasynda budan buryn sheteldiktermen jáne sheteldik úlesi bar qazaqstandyq kompaniialarmen jalǵa alynǵan aýyl sharýashylyǵy jerleriniń paidalaný merzimin uzartylmaityndyǵy jáne olardyń paidalaný merzimi aiaqtalǵanǵa deiin ǵana ielikte bolatyny qarastyrylǵan.
Omarovtyń aitýynsha, qandastar boiynsha olar jeke qosalqy sharýshylyǵy, baý-baqsha jáne saiajai qurylysy úshin jer ýchaskesin ala alady, aýyl sharýashylyǵy jerlerin Qazaqstan azamattyǵyn alǵannan keiin ǵana jalǵa alýǵa múmkindigi bar.
