Prezident Qasym-Jomart Toqaev aýyl sharýashylyǵy ministrin qyzmetinen bosatty, dep habarlaidy "Ult aqparat" Aqordanyń baspasóz qyzmetine silteme jasap.
"Memleket basshysynyń Jarlyǵymen Saparhan Kesikbaiuly Omarov Qazaqstan Respýblikasynyń Aýyl sharýashylyǵy ministri laýazymynan bosatyldy", - delingen resmi habarlamada.
Aita keteiik, búgin Úkimettiń keńeitilgen otyrysynda Qasym-Jomart Toqaev Mańǵystaý jáne Qyzylorda oblystaryndaǵy qaýańshylyqqa bailanysty aýyl sharýashylyǵy ministrligi men ákimdikter tarapynan tiisti sharalardyń qolǵa alynbaǵanyn erekshe atap ótti.
"Júieli ári naqty jumys atqarylmaǵan. Sonyń kesirinen sharýalarymyz tyǵyryqqa tirelip otyr. Naqty is-áreket pen keri bailanys joq. Sondyqtan fermerler kómek surap, tikelei maǵan ótinish aityp jatyr. Árine, qýańshylyq – tabiǵi jaǵdai. Muny jaqsy túsinemin. Degenmen bul máseleniń bir jaǵy ǵana. Eń bastysy osyndai kúrdeli kezeńde tiisti ministrlik shuǵyl jáne batyl sheshimder qabyldaýy qajet edi", - dep atap ótti Prezident.
Onyń pikirinshe, ministrlik bul jumysty tiimdi uiymdastyra alǵan joq.
"Sondyqtan osy salaǵa birden bir jaýapty tulǵa retinde ministr Saparhan Omarovtyń otstavkaǵa ketkeni durys dep esepteimin ", - dedi Toqaev.
Saparhan Omarov 1968 jyly 5 mamyrda Shymkent oblysynda dúniege kelgen. V. Plehanov atyndaǵy Resei ekonomika akademiiasyn jáne Qazaq memlekettik zań ýniversitetin ekonomist jáne zańger mamandyqtary boiynsha bitirgen.
Eńbek jolyn 1995 jyly Qazaqstan Respýblikasy Ulttyq komissiiasynyń mamany qyzmetinen bastaǵan.
1996 jyldan 2007 jyldar aralyǵynda - "Azyq-túlik kelisimshart korporatsiiasy" AQ bólim basshysy, basqarma bastyǵynyń orynbasary, basqarma basshysy, departament direktory jáne basqarýshy direktor qyzmetterin atqardy.
2007 jyly - "Azyq-túlik kelisimshart korporatsiiasy" AQ-nyń vitse-prezidenti boldy.
2007-2008 jyldary - Qazaqstan Respýblikasy Prezidentiniń Is Basqarmasy Qazaqstan Respýblikasy Parlamentiniń Sharýashylyq basqarmasy bastyǵynyń orynbasary. 2008-
2011 jyldary - Qazaqstan Respýblikasy Prezidenti Ákimshiligi Aýmaqtyq-uiymdastyrý jáne memlekettik baqylaý bóliminiń memlekettik inspektory.
2011-2014 jyldary - Respýblikalyq biýdjettiń atqarylýyn baqylaý jónindegi esep komitetiniń múshesi.
2014 jyldan bastap 2016 jylǵa deiin - Qazaqstan Respýblikasy aýyl sharýashylyǵynyń vitse-ministri.
2016 jyldan bastap 2019 jyl aralyǵynda - VI sailanǵan Qazaqstan Respýblikasy Parlamenti Májilisiniń depýtaty, Agrarlyq máseleler komitetiniń tóraǵasy.
2019 jylǵy 25 aqpanda Prezident Jarlyǵymen aýyl sharýashylyǵy ministri qyzmetine taǵaiyndaldy.
2021 jylǵy 18 qańtarda QR Prezidentiniń Jarlyǵymen aýyl sharýashylyǵy ministri qyzmetine qaita taǵaiyndaldy.
