پرەزيدەنت قاسىم-جومارت توقاەۆ اۋىل شارۋاشىلىعى مينيسترٸن قىزمەتٸنەن بوساتتى, دەپ حابارلايدى "ۇلت اقپارات" اقوردانىڭ باسپاسٶز قىزمەتٸنە سٸلتەمە جاساپ.
"مەملەكەت باسشىسىنىڭ جارلىعىمەن ساپارحان كەسٸكبايۇلى وماروۆ قازاقستان رەسپۋبليكاسىنىڭ اۋىل شارۋاشىلىعى مينيسترٸ لاۋازىمىنان بوساتىلدى", - دەلٸنگەن رەسمي حابارلامادا.
ايتا كەتەيٸك, بٷگٸن ٷكٸمەتتٸڭ كەڭەيتٸلگەن وتىرىسىندا قاسىم-جومارت توقاەۆ ماڭعىستاۋ جەنە قىزىلوردا وبلىستارىنداعى قاۋاڭشىلىققا بايلانىستى اۋىل شارۋاشىلىعى مينيسترلٸگٸ مەن ەكٸمدٸكتەر تاراپىنان تيٸستٸ شارالاردىڭ قولعا الىنباعانىن ەرەكشە اتاپ ٶتتٸ.
"جٷيەلٸ ەرٸ ناقتى جۇمىس اتقارىلماعان. سونىڭ كەسٸرٸنەن شارۋالارىمىز تىعىرىققا تٸرەلٸپ وتىر. ناقتى ٸس-ەرەكەت پەن كەرٸ بايلانىس جوق. سوندىقتان فەرمەرلەر كٶمەك سۇراپ, تٸكەلەي ماعان ٶتٸنٸش ايتىپ جاتىر. ەرينە, قۋاڭشىلىق – تابيعي جاعداي. مۇنى جاقسى تٷسٸنەمٸن. دەگەنمەن بۇل مەسەلەنٸڭ بٸر جاعى عانا. ەڭ باستىسى وسىنداي كٷردەلٸ كەزەڭدە تيٸستٸ مينيسترلٸك شۇعىل جەنە باتىل شەشٸمدەر قابىلداۋى قاجەت ەدٸ", - دەپ اتاپ ٶتتٸ پرەزيدەنت.
ونىڭ پٸكٸرٸنشە, مينيسترلٸك بۇل جۇمىستى تيٸمدٸ ۇيىمداستىرا العان جوق.
"سوندىقتان وسى سالاعا بٸردەن بٸر جاۋاپتى تۇلعا رەتٸندە مينيستر ساپارحان وماروۆتىڭ وتستاۆكاعا كەتكەنٸ دۇرىس دەپ ەسەپتەيمٸن ", - دەدٸ توقاەۆ.
ساپارحان وماروۆ 1968 جىلى 5 مامىردا شىمكەنت وبلىسىندا دٷنيەگە كەلگەن. ۆ. پلەحانوۆ اتىنداعى رەسەي ەكونوميكا اكادەميياسىن جەنە قازاق مەملەكەتتٸك زاڭ ۋنيۆەرسيتەتٸن ەكونوميست جەنە زاڭگەر ماماندىقتارى بويىنشا بٸتٸرگەن.
ەڭبەك جولىن 1995 جىلى قازاقستان رەسپۋبليكاسى ۇلتتىق كوميسسيياسىنىڭ مامانى قىزمەتٸنەن باستاعان.
1996 جىلدان 2007 جىلدار ارالىعىندا - "ازىق-تٷلٸك كەلٸسٸمشارت كورپوراتسيياسى" اق بٶلٸم باسشىسى, باسقارما باستىعىنىڭ ورىنباسارى, باسقارما باسشىسى, دەپارتامەنت ديرەكتورى جەنە باسقارۋشى ديرەكتور قىزمەتتەرٸن اتقاردى.
2007 جىلى - "ازىق-تٷلٸك كەلٸسٸمشارت كورپوراتسيياسى" اق-نىڭ ۆيتسە-پرەزيدەنتٸ بولدى.
2007-2008 جىلدارى - قازاقستان رەسپۋبليكاسى پرەزيدەنتٸنٸڭ ٸس باسقارماسى قازاقستان رەسپۋبليكاسى پارلامەنتٸنٸڭ شارۋاشىلىق باسقارماسى باستىعىنىڭ ورىنباسارى. 2008-
2011 جىلدارى - قازاقستان رەسپۋبليكاسى پرەزيدەنتٸ ەكٸمشٸلٸگٸ اۋماقتىق-ۇيىمداستىرۋ جەنە مەملەكەتتٸك باقىلاۋ بٶلٸمٸنٸڭ مەملەكەتتٸك ينسپەكتورى.
2011-2014 جىلدارى - رەسپۋبليكالىق بيۋدجەتتٸڭ اتقارىلۋىن باقىلاۋ جٶنٸندەگٸ ەسەپ كوميتەتٸنٸڭ مٷشەسٸ.
2014 جىلدان باستاپ 2016 جىلعا دەيٸن - قازاقستان رەسپۋبليكاسى اۋىل شارۋاشىلىعىنىڭ ۆيتسە-مينيسترٸ.
2016 جىلدان باستاپ 2019 جىل ارالىعىندا - VI سايلانعان قازاقستان رەسپۋبليكاسى پارلامەنتٸ مەجٸلٸسٸنٸڭ دەپۋتاتى, اگرارلىق مەسەلەلەر كوميتەتٸنٸڭ تٶراعاسى.
2019 جىلعى 25 اقپاندا پرەزيدەنت جارلىعىمەن اۋىل شارۋاشىلىعى مينيسترٸ قىزمەتٸنە تاعايىندالدى.
2021 جىلعى 18 قاڭتاردا قر پرەزيدەنتٸنٸڭ جارلىعىمەن اۋىل شارۋاشىلىعى مينيسترٸ قىزمەتٸنە قايتا تاعايىندالدى.
