QR Aýyl sharýashylyǵy ministri Saparhan Omarov agroónerkásiptik keshendi memlekettik qoldaý sharalary týraly aitty, dep habarlaidy "Ult aqparat".
«Agroónerkásiptik keshenniń básekege qabilettiligin arttyrý maqsatynda 2021 jylǵa deiingi memlekettik baǵdarlamasyn iske asyrý jalǵasýda. Ony iske asyrý kezeńinde salany damytý boiynsha qajetti sharalar qabyldandy. Memlekettik qoldaý kólemi tek sońǵy úsh jylda
1,5 ese ulǵaiyp, 2020 jyly 350 mlrd teńgege deiin jetti. Bul rette sýbsidiialardyń 95 paiyzdan astamyn tikelei aýyldyq jerlerde ornalasqan agroónerkásiptik keshen sýbektileri alady.
Agroónerkásiptik keshendegi sýbsidiialaý barynsha ońailatyldy jáne tolyqtai avtomattandyryldy, bul sýbsidiia berý protsesiniń ashyqtyǵyn qamtamasyz etýge múmkindik beredi», - dedi S. Omarov Senattaǵy aýyldyq aýmaqtardy damytý jónindegi parlamenttik tyńdaýda.
Onyń sózine qaraǵanda memlekettik qoldaý sharalaryn jetildirý sheńberinde ósimdik sharýashylyǵyndaǵy barlyq sýbsidiialar Biryńǵai qaǵidalarǵa biriktirilgen. Ósimdikterdi qorǵaý quraldaryn sýbsidiialaý keńeitildi. Endi gerbitsidter ǵana emes, pestitsidterdiń basqa da túrleri sýbsidiialanady. Basty jańalyqtardyń biri - sýbsidiialardy kúntizbelik jyl aiasynda emes, tuqymdar, tyńaitqysh, pestitsidter satyp alynǵan kúnnen bastap 12 ai boiy alýǵa bolady.
«Fermerler úshin qolaily jaǵdai jasaý maqsatynda mal satyp alýǵa kredit berý kezinde kepil saiasaty ońtailandyryldy. Máselen, kepilge maldyń ózi (85%) alynady, bul rette anyq kepilmen qamtamasyz etý nebári 15%-dy quraidy.
«Qarjy quraldaryn jetildirý sheńberinde ainalym qarajatyn tolyqtyrýǵa arnalǵan kreditter boiynsha syiaqy mólsherlemelerin sýbsidiialaý normativi 5 paiyzdan 7 paiyzǵa deiin ulǵaidy, egis jáne egin jinaý jumystaryn júrgizýge syiaqy mólsherlemesiniń 9 paiyzy sýbsidiialanady.
Agroónerkásiptik keshen sýbektileri úshin jetkilikti kepildik bazasy bolmaǵan jaǵdaida, ekinshi deńgeili bankterdiń kreditterine kepildik berý tetigi qoljetimdi boldy, ol Aýyl sharýashylyǵyn qarjylai qoldaý qory arqyly iske asyrylady. Kepildikter kredit somasynyń 50 paiyzyn jáne basym investitsiialyq jobalar boiynsha 85 paiyzdy quraidy», - dedi ministr.
«Jyl saiyn QazAgronyń enshiles kompaniialary arqyly agroónerkásiptik keshendi qarjylandyrý kólemi ulǵaiýda, 2020 jyldyń 9 aiynyń qorytyndysy boiynsha ol
325 mlrd teńgeden astam somany qurady. Bul rette 2019 jyly QazAgronyń agroónerkásiptik keshendi kreditteý kólemi shamamen 449 mlrd teńgeni qurady, bul Holding jumys istegen barlyq jyldardaǵy eń joǵary kólem bolyp otyr», - dedi S. Omarov.
