7 jeltoqsan kúni QR Premer-Ministriniń orynbasary Berdibek Saparbaev elordadaǵy «Januia» otbasy institýtyn qoldaý ortalyǵynda azamattardy qabyldady, dep habarlaidy "Ult aqparat" QR Úkimetiniń baspasóz qyzmetine silteme jasap.
Astana turǵyndary meditsinalyq kómek kórsetýge, áleýmettik qyzmetterge, turǵyn úimen jáne dári-dármektermen qamtamasyz etýge, eńbekke ornalastyrýǵa qatysty jáne basqa da problemalyq máselelerdi kóterdi.
Egde tartqan múgedek anasyna kútim jasap otyrǵan Elena Solonik áleýmettik kómek organdary usynatyn ońaltý jáne gigiena quraldarynyń sapasynyń tómendigine jáne olarmen ýaqytyly qamtamasyz etilmeitinine shaǵymdandy.
«8 jyl buryn satyp alǵan arbamyz bizge biyl berilgen múgedekter arbasynan áldeqaida sapaly. Gigiena quraldaryn biz keshe ǵana aldyq, olardyń sapasy da tym tómen», - dedi E. Solonik.
Vitse-premer qalanyń jumyspen qamtý jáne áleýmettik qorǵaý basqarmasyna osy máseleni sheshýdi jáne múgedek jandardy sapaly ońaltý jáne gigiena quraldarymen qamtamasyz etýdi tapsyrdy.
«Biz bul problema týraly bilemiz. Ol tek sizdiń otbasyńyzǵa ǵana emes, elimizdegi barlyq múgedekterge qatysty. Sondyqtan kelesi jyldan bastap biz Áleýmettik qyzmetter portalyn iske qosamyz. Ol qazirdiń ózinde Aqtóbe oblysynda pilottyq rejimde jumys istep jatyr. Osy portal arqyly múgedek jandar óz betinshe kórsetiletin qyzmetter men tehnikalyq ońaltý quraldaryn tańdai alady», - dedi B. Saparbaev.
Nýzigúl Aqan óziniń ulyna múgedektik tobyn berý máselesin sheshýde kómek kórsetýdi surady. Jas jigittiń júregine kúrdeli operatsiia jasalǵan, oǵan taǵy ota jasatý kerek.
Qajetti tekserýler júrgizip, qoldanystaǵy zańnama sheńberinde osy máseleni sheshý densaýlyq saqtaý jáne áleýmettik qorǵaý organdaryna tapsyryldy.
Bul kúni vitse-premer barlyǵy 12 azamatty qabyldady. Júgingen azamattardyń barlyq ótinishteri men usynystaryn tyńdaǵan soń Berdibek Saparbaev túsinik berip, tiisti memlekettik organdarǵa zańnama aiasynda máselelerdi sheshýde yqpal kórsetýdi tapsyrdy.
