QR Premer-Ministriniń orynbasary Berdibek Saparbaev bastaǵan úkimettik jumys toby Soltústik Qazaqstan oblysyna keldi. Onyń quramynda QR Eńbek jáne halyqty áleýmettik qorǵaý ministri Birjan Nurymbetov, Bilim jáne ǵylym vitse-ministri Sholpan Karinova, Densaýlyq saqtaý ministri Kamaljan Nadyrov, mádeniet jáne sport ministri Eldos Ramazanov, Aqparat jáne qoǵamdyq damý vitse-ministri Daniiar Esin bar.
Astanalyqtardyń jumys sapary Qyzyljar aýdanyndaǵy eńbek kúshi mol óńirlerden qonys aýdarýshylarǵa arnalǵan turǵyn úilerdi aralaýdan bastaldy. Bul úiler ónimdi jumyspen qamtý jáne jappai kásipkerlikti damytý "Eńbek" memlekettik baǵdarlamasy aiasynda salynýda. Biyl oblysymyzǵa 688 otbasy qonys aýdardy. Ondaǵy 2060 adamnyń 1031-i jumysqa qabiletti jasta, 935 – jetkinshek, 57 – stýdent, 37 – zeinetker. Oblystyń áleýmettik-ekonomikalyq damýynyń keshendi jospary negizinde 2142 úidiń qurylysy qarastyrylǵan. 428 úi biyl salyndy. Eki jatyn bólme, zal jáne as úi 120 sharshy metrdi quraidy.
Berdibek Saparbaev Qyzyljar aýdanynyń Báiterek aýylynda turǵyzylǵan úilerdi aralap, qonystanýshylarmen emen-jarqyn áńgimelesti. "Jylý úige kirip, ómir súre berýge bolady", – deidi Rýslan Nasyrov. Ol bul aýylǵa mamyr aiynda áieli jáne eki balasymen Túrkistan oblysy Qazyǵurt aýdanynan qonys aýdaryp kelgen. Óz sheshiminiń durys ekendigine kózi jetken otaǵasy osy aýyldy turaqtap qalmaq.
"Bul óńirdiń topyraǵyn alǵash dosyma qonaqqa kelip basqan bolatynmyn. Meni kóshýge kóndirgen sol. Jumyspen qamtý ortalyǵyna baryp, qandai bos jumys oryndary bar ekenin suradym. Ondaǵy mamandar barlyǵyn túsindirdi, sharttarǵa qulaǵdar etti. Birneshe jumys ornyn usynyp, tańdaý jasaýǵa múmkindik jasady. Baspana máselesi ońai sheshiletinin aitty. Biz – jas otbasymyz. Qol jetkizýge tiisti josparymyz da kóp. Báiterek bizge unady. Adamdary keńpeiildi, kómek qolyn sozǵa qashanda daiyn, – deidi Rýslan Nasyrov.
Jańa úiler jyly, jaryq, qolaily. Turǵyndardyń kóńilinen shyǵyp otyr.
Jumys toby atbasyn tiregen kelesi nysan – jergilikti mektep boldy. Qonaqtar Báiterek aýylynyń turǵyndarymen kezdesip, jyly sózder estidi. Turǵyndar aýylynyń bir orynda turmai damyp, kórkeiip kele jatqandyǵyn maqtanyshpen aitty. Sý, kommýnikatsiia máselesinde esh qiyndyq joq. Turǵyndar úkimet basshysynyń orynbasaryna tek balabaqshanyń jitispeitindigin aityp, osy máselege qolǵabys jasaýdy ótindi.
Vitse-premer Beskól aýylynda da boldy. Aýdan ákimdiginde jumys tobynyń halyqpen kezdesýi uiymdastyryldy. QR Eńbek jáne halyqty áleýmettik qorǵaý ministri Birjan Nurymbetov kópbalaly jáne az qamtylǵan otbasylardy qoldaýdyń jańa tásilderi týraly egjei-tegjeili aityp berdi.
Berdibek Saparbaev jumys tobynyń basty mindeti halyqtyń ómir súrý sapasyn baǵalaý jáne problemalyq máselelerdi sheshýge járdemdesý dep atap kórsetti. Ásirese, bilim jáne densaýlyq saqtaý siiaqty mańyzdy áleýmettik salalarǵa erekshe toqtaldy.
"12 jyldyq bilim berýge kóshýge keletin bolsaq, qazir arnaiy top jumys isteýde. Prezident eń bastysy mektepterdiń, muǵalimderdiń, oqýlyqtardyń daiyndyǵyn sheship baryp, asyqpai oryndaýǵa tapsyrma bergen bolatyn, – degen vitse-premer sózin jalǵap –Aýyldyq jerlerde muǵalimderdiń jetispeýshiligi bolmasa, bul salada basqa ózekti másele joq. "Diplommen aýylǵa" baǵdarlamasy boiynsha biz jergilikti atqarýshy organdarmen jumysty shiratyp, muǵalimderge tiisti jaǵdaidy qamtamasyz etýimiz kerek. Mektepterdi zerthanalarmen, kabinettermen jabdyqtaý boiynsha jumystar qarqyndy jalǵasyn tabady».
Sondai-aq Berdibek Saparbaev azamattardy memleket beretin múmkindikterdi paidalanýǵa jáne memlekettik baǵdarlamalarǵa qatysýǵa shaqyrdy. "Túrli salada 14 memlekettik baǵdarlama bar. Olar arqyly 500 myń teńgege tegin grant alý múmkindigi bar, sondai-aq jeńildikpen mikrokredit alýǵa da bolady. Biraq, ókinishke orai, kópshilik qoljetimdi mehanizmderdi paidalanbaidy. Bireý bilse, bireý bilmeidi. Eń bastysy – adamnyń óz isin ashýǵa degen nieti. Biz bul tetikterdiń halyq úshin jumys isteýin kózdeimiz. Turǵyndar bul kómekterdi paidalanyp, jumys istep, aqsha taýyp, otbasylaryn asyrai alýy úshin baǵdarlamalardy odan ári jetildire túsemiz, – dep atap ótti Berdibek Saparbaev.
Kezdesý sońynda jumys tobynyń músheleri halyqtyń suraqtaryna jaýap berdi.
