Aqtóbe oblysynyń ákimi Berdibek Saparbaev terrorizm jáne dini ekstremizmmen kúres jolynda birqatar usynys aitty, dep habarlaidy QazAqparat tilshisi.
Aqtóbede Parlament Májilisiniń Halyqaralyq ister, qorǵanys jáne qaýipsizdik komiteti kóshpeli otyrys ótkizgen bolatyn. Jiyn kezinde Májilis tóraǵasy Nurlan Nyǵmatýllin terrorlyq áreketti júzege asyrmaq bolǵan 220-dan astam adamnyń jazalanǵanyn aitty.
Qazir Aqtóbe oblysynda jaǵdai turaqty. Ótken jyly Bas Prokýratýranyń «Halyq qaýipsizdigi úshin» atty jumysy biyl jergilikti jerde jalǵasyp, jat aǵymdy nasihattaityn birqatar saittar jabyldy. Degenmen másele áli tolyqqandy sheshimin tapqan joq.
«Quqyq qorǵaý organdary salafizm baǵytyn ustanatyn 64 adamdy ustady. Bul baǵyttaǵy jumys ári qarai jalǵasady. Sonymen qatar, sol quqyq qorǵaý organdarymen birlese otyryp jat aǵym jeteginde júrgen adamdardyń tolyq tizimi jasaldy. Qazir olardyń sany - 2255. Ótken jyly 2450 adam bolǵan edi. Sońǵy 7 aida destrýktivti dindi ustanatyndar 197 adamǵa deiin qysqardy. Bizde árqaisysy týraly aqparat bar. Olardyń nemen ainalysatyny, qaida jumys isteitini, kimdermen aralasatyny, otbasy týraly tolyq málimet jinaqtalǵan, jeke jumys júrip jatyr. Ásirese, aýylda. Ákimnen bastap, ýchaskelik inspektor, ardagerler, qoǵamdyq uiym ókilderi túsindirý jumystaryn jalǵastyryp keledi», - dedi oblys ákimi Berdibek Saparbaev.
Qazir Aqtóbedegi qarý-jaraq dúkenderiniń bárinde dabyl túimesi jumys istep tur. Bárine beinekamera qondyrylyp, qarý-jaraq saqtaý qoimasynyń qaýipsizdigi kúshteitildi. Dúkenderden túsetin dabyl aldymen oblystyq ishki ister departamentiniń arnaiy qyzmetine, halyqqa qyzmet kórsetý ortalyǵyna jetedi. Jiyn kezinde oblys ákimi Berdibek Saparbaev terrorizm jáne dini ekstremizmmen kúrestiń birneshe jolyn usyndy.
«Aldymen salafizmge zańdy túrde tyiym salý qajet. Sonymen qatar, elimiz boiynsha tyiym salynǵan ádebietter tizimin qaita qarap, olardy joiý jumystaryn jandandyrǵan durys. Bizge áiel teologtar kerek. Sebebi jat aǵym jeteginde júrgenderdiń 30 paiyzy áielder. Balalardy vaktsinatsiialaý da mańyzdy. Bul problema aldaǵy ýaqytta ýshyǵyp ketýi múmkin. Qazir óńirde 2500-den astam bala ekpe almaǵan. Bári sol dini kózqarasta júrgen ata-analardyń balalary. Dini joǵary bilimdi shetelde emes, elimizde alǵan durys. Bizdiń oiymyzsha, jergilikti jerdegi joǵary oqý oryndarynda teologtar daiyndaý kerek. Sebebi, qazir teolog maman tapshy. Mektepterde dini kiimder kiiýge de tyiym salǵan jón», - dedi Berdibek Saparbaev.
