Pavlodar oblysyna jumys saparymen kelgen QR Premer-Ministriniń orynbasary Berdibek Saparbaev pen Bilim jáne ǵylym vitse-ministri Sholpan Karinova M. Kataev atyndaǵy oqýshylar saraiyn aralady, dep habarlaidy pavlodarnews.kz.
Úkimettiń jumys tobyna oqýshylar saraiynda atqarylyp jatqan jumystar tanystyryldy. Sonyń biri – 2018 jyldyń mamyr aiynda ashylǵan balalar tehnosaiabaǵy.
- Tehnosaiabaqta 500-den astam bala bar, - dedi oqýshylar saraiynyń basshysy Alma Erýbaeva. – Barlyǵy tegin bilim alady. Olarmen 14 pedagog jumys isteidi. Tehnosaiabaq Elbasy Joldaýyn júzege asyrý aiasynda ashylǵan bolatyn. Balalardyń jan-jaqty bilim alýy úshin zamanǵa sai tehnikamen, 3D printermen jabdyqtalǵan. Munda daiyndalǵan jas órender ózderiniń túrli jobalarymen respýblikalyq baiqaýlarǵa qatysyp turady.
«Tsifrly Qazaqstan» baǵdarlamasy aiasynda qurylǵan saiabaqta IT-synyp, Start-Up Academy, 3D-modeldeý jáne robotkeshendi zerthanalary, astrozerthana, telestýdiia jumys isteidi.
- Bilimniń sapaly bolýy birinshiden - ata-anaǵa, ekinshiden – muǵalimge, úshinshiden – bilikke bailanysty, - dep atap ótti Berdibek Saparbaev pedagogtar qaýymymen kezdesýinde. – Sol úsh tarmaq birigip jumys jasasa, bilim sapasy jaman bolmaidy. Jalpy, Pavlodar oblysynyń bilim sapasyn bilemiz, qarap otyramyz. Sapasy jaqsy. Onyń ústine sońǵy málimet boiynsha, Pavlodar oblysynyń bilim salasy qazirgi tańda birinshi orynda. Bul – óte jaqsy. Birinshiden, tańnyń atysynan, kúnniń batysyna deiingi sizderdiń eńbekterińiz jáne jergilikti biliktiń qoldaýynyń nátijesi.
Aita keteiik, 2018-2019 oqý jylynyń I jarty jyldyǵynda oqýshylar saraiynyń shyǵarmashylyq ujymdary halyqaralyq, respýblikalyq jáne oblystyq deńgeidegi 15 baiqaýǵa qatysyp, 39 marapatqa ie boldy. M. Kataev atyndaǵy oqýshylar saraiynda barlyǵy 3 myńnan astam oqýshy men 152 pedagog bar.
Eske sala keteiik, ótken jyly oqýshylardy jańa zaman talabyna sai jańashyldyqqa úiretip, tárbielep júrgen oqýshylar saraiy 40 jyldyq mereitoiyn atap ótti.
