Qazaqstanda biznestiń áleýmettik jaýapkershiligi degen uǵym bar. Jambyl oblysynyń ákimi Berdibek Saparbaev jol qurylysyna jumyldyrylǵan qytailyq kompaniia basshylarymen kezdesýinde osylai aityp, olardy áleýmettik máselelerdiń sheshimine atsalysýǵa shaqyrdy, dep habarlaidy "Ult aqparat".
Berdibek Saparbaevtyń Shý aýdanyna jumys sapary barysynda jol máselelerine basa mán berildi. Aýdan aýmaǵynda uzyndyǵy 262 shaqyrym bolatyn Merki-Býrylbaital avtojolyn qaita jańǵyrtý boiynsha aýqymdy joba júzege asyrylýda. Oblys ákimi qurylysy júrip jatqan aýmaqtarda bolyp, jol-qurylys kompaniialarynyń basshylarymen kezdesti.
Iri jobaǵa qytailyq «China Xinxin Corporation» jáne qazaqstandyq «ABK-Avtodor NS» kompaniialary tartylǵan. Sonymen qatar, «Sinohydro Corp Limited» kompaniiasy Balqash-Býrylbaital jolynyń 35,6 shaqyrymyn salýda. Al «Todini and SMS» birlesken kásiporny Kúrti-Býrylbaital trassasynyń 62 shaqyrymdyq aýmaǵynyń qurylysyn iske asyrýda. Oblys ákimimen bolǵan kezdesýge Uzynaǵash - Otar jolynyń qurylysyn atqaryp jatqan qazaqstandyq merdigerlik uiym «QazaqJolQurylys» ókilderi de qatysty. Aita ketý kerek, atalǵan avtojoldyń 16 shaqyrymy Jambyl oblysy aýmaǵy arqyly ótedi.
Qazaq tilinde suhbattasqan Berdibek Saparbaevqa tilmash arqyly jaýap bergen qytailyq merdigerlerge Qazaqstan zańdaryn qatań saqtaý kerektigi eskertildi. Sondai-aq oblys ákimi qytailyq kásiporyndardyń jalaqysy tómendigin alǵa tartyp, onyń kólemin jyl saiyn kem degende 10 paiyzǵa arttyryp otyrý kerektigin atap ótti. Budan bólek, barlyq jumysshylar úshin teń jaǵdai jasaý kerektigin eske salyp, ásirese jalaqy, tamaqtaný jáne júrip-turý máselelerine kóńil bóldi.
B.Saparbaev mal ótkelderin salý jáne jol boiyndaǵy aryqtar men kópirlerdi jóndeý qajettigin basa aitty. Jol jóndeý jumystary jaqyn mańda ornalasqan jergilikti turǵyndardyń 13 úiiniń qabyrǵalarynyń jarylýyna sebep bolǵan. Olardy 15 kúnnen keshiktirmei jóndeý kerek. Bul úshin 8,5 million teńge qajet.
«Qazaqstanda biznestiń áleýmettik jaýapkershiligi degen uǵym bar. Kompaniialar jaqyn mańdaǵy eldi mekenderge, oblys ortalyǵyna áleýmettik máselelerdi sheshýge kómek kórsetýi kerek. Ásirese, koronavirýs jaǵdaiyn eskere otyryp, jaǵdaiy tómen, kópbalaly otbasylarǵa kómektesý qajet.
Qazaqstan Respýblikasynyń zańdary, onyń ishinde «Til týraly» Zańy qatań saqtalýy kerek. Memlekettik tilimiz – qazaq tili. Barlyq mańdaishalar, onyń ishinde kireberiste ornalasqan kompaniianyń ataýy da qazaq tilinde bolýy kerek. Osynda qaita kelip, tapsyrmalardyń qalai oryndalǵanyn tekseremin», - dep atap ótti oblys ákimi.
Qytai kompaniialarynyń jetekshileri Saparbaevtyń talaptaryna tolyqtai kelisetindikterin bildirdi.
Merki-Býrylbaital jolynyń bir baǵytyn biyl aiaqtaýǵa múmkindik bar ma? Merdigerler qurylysty tolyǵymen jospardan bir jyl buryn, iaǵni 2021 jyly aiaqtai ala ma? Berdibek Saparbaev osy sekildi birqatar saýalyn qoidy.
Bul máselelerde aimaq basshysy merdigerler tarapynan túsinistik tapty.
Talqylaý kórsetkendei, jol salýshylardyń aldynda eshqandai kedergiler kezdesip otyrǵan joq. «Todini and SMS» BK basshysy Moiynqum aýdany aýmaǵynda karerlerdi bólýge qol ushyn berýdi surady.
«Eń bastysy, barlyq jumystar ýaqtyly jáne sapaly atqarylýy kerek. Merki jáne Shý aýdandary arasyndaǵy joldyń bir baǵytynyń qurylysyn biyl aiaqtaý kerek. Jol qurylysynda jergilikti materialdar paidalanylyp, al jergilikti adamdar jumyspen qamtylǵany mańyzdy. Jol salýshylar qazaqstandyq óndirýshilermen kelisimsharttar jasasyp, bitým qoryn qalyptastyrý kerek...
Sonymen qatar, qazirgi jaǵdaida, ásirese qurylysshylarǵa arnalǵan jataqhanalarda sanitarlyq normalardy qatań saqtaý – basty talap bolyp tabylady. Adamdardyń densaýlyǵy bárinen mańyzdy», - dep túiindedi Berdibek Saparbaev.
Aita keteiik, Jambyl oblysynyń ákimi apparat keńesinde Merki-Býrylbaital respýblikalyq avtojolynyń qurylysyn kelesi jyly aiaqtaýdy tapsyrǵan bolatyn.
