Sortóbe aýylyndaǵy Mádeniet úiinde ótken aqsaqaldarmen kezdesý barysynda vitse-premer jergilikti turǵyndardy sabyrǵa jáne túrli arandatýlarǵa ilespeýge shaqyrdy, dep habarlaidy "Ult aqparat" Úkimet basshysynyń baspasóz qyzmetine silteme jasap.
«Bizdiń mindetimiz – turǵyndardyń qaýipsizdigi men quqyqtyq tártiptiń saqtalýyn qamtamasyz etý. Keshegi qaiǵyly jaǵdai qaitalanbaýy tiis. Ol úshin Memleket basshysynyń tapsyrmasymen óńirge Úkimet komissiiasy men quqyq qorǵaý organdarynyń qyzmetkerleri keldi. Biz tártip ornatamyz, sizderden sabyr saqtaýdy ótinemiz. Bizde barlyq qajetti quraldar men kúshter jetkilikti», - dedi ol.
Vitse-premerdiń aitýynsha, kikiljińdi týdyrǵandar men arandatýshylardy arnaiy operativtik tergeý toby anyqtaityn bolady, bul top bolǵan oqiǵanyń barlyq jaǵdailaryna obektivti tergeý júrgizedi.
«Biz árdaiym kelisimmen, tatý ómir súrdik. Mundai jaǵdai alǵash ret bolyp otyr. Jastar arasynda usaq kelispeýshilikter oryn alatyn, biraq menińshe, keshegi oqiǵaǵa úshinshi tarap qatysqan», - degen pikirin bildirdi aqsaqaldardyń biri.
Óz kezeginde, Berdibek Saparbaev oqiǵanyń tek turmystyq sipattaǵy kikiljiń ekenin taǵy bir atap ótti.
«Biz bárimiz Qazaqstan Respýblikasynyń azamattarymyz. Bul jerde eshqandai ulttyq másele joq. Turmystyq kikiljiń boldy, ony arandatýshylar paidalanyp, basqa arnaǵa buryp jiberdi», - dedi ol.
Sonymen qatar Úkimet komissiiasynyń músheleri BAQ ókilderine arnalǵan baspasóz konferentsiiasyn ótkizdi.
