Aqtóbe oblysynda 8 mektep paidalanýǵa berildi. Bilim kúni 16 myńnan astam bala mektep tabaldyryǵyn alǵash ret attady, dep habarlaidy QazAqparat tilshisi.
Aqtóbe oblysynda barlyǵy 25 mekteptiń qurylysy júrip, jańa oqý jylynda 8 mektep paidalanýǵa berildi. Onyń úsheýi oblys ortalyǵynda, ózgesi aýdan, aýylda. Mirjaqyp Dýlatov atyndaǵy orta mekteptiń alqashqy qońyraý saltanatyna qatysqan oblys ákimi Berdibek Saparbaev eldiń bolashaǵy bilimdi urpaqta ekenin basa aitty.
«Árbir halyqtyń bolashaǵy urpaǵynyń bilimi, tárbiesi, mádenietine bailanysty. Sondyqtan árbir memleket óz bolashaǵy úshin bilimge úlken kóńil bóledi. Biz kompiýter, internet degendi bilmedik. Ol kezde balalarymyz sheteldiń eń myqty joǵary oqý oryndarynda bilim alady, mektepterdegi ádistemeler dúniejúzilik standartqa sai daiyndalady, árbir óńirde maman talabyna sai ziiatkerlik mektep ashylady, Qazaqstanda álemniń úzdik professorlary dáris oqityn joǵary oqý orny bolady dep oilamadyq. Qazir barlyq múmkindik bar. Tek sharshamai, jalyqpai jaqsy bilim alý kerek. Qazir ár kún, árbir saǵat qymbat. Balalardyń bilim alýy ata-analaryna bailanysty. Eger ata-ana balasynyń, qoǵamnyń aldyndaǵy jaýapkershiligin tolyq oryndasa, balasy bilimdi, tárbieli bolady. Ekinshiden, ustazǵa bailanysty. Ustaz jan-jaqty bilim berýi kerek. Kitapta jazylǵandy bala ózi oqyp alady, ustaz onyń oiyn damytýy kerek», - dedi óńir basshysy B.Saparbaev.
Jańa mektepte búgin «Men - elimniń patriotymyn», «Meniń Otanym - Qazaqstan» atty tárbie saǵattary ótti. Mektep «Nurly jol» baǵdarlamasy aiasynda salyndy. Qurylysqa Ulttyq qordan 673 million teńge bólinip, igerildi. Munda fizika, himiia pánderine arnalǵan arnaiy laboratoriia bar. Sport zal men májilis zaly da qarastyrylǵan.
«Qurylys jumystary kezinde sahna óte úlken boldy. Joba boiynsha 4 grimdeý bólmesi jasalǵan eken. Mektep úshin mańyzdysy - sahna men kórermen zaly. Keiin ózgertip, kórermen zalynyń aýmaǵy keńeitildi», - dedi Berdibek Saparbaev. Buǵan deiin habarlaǵanymyzdai, Aqtóbede 16 myńnan astam bala 1-synypqa bardy.
