Jambyl oblysynyń ákimi Berdibek Saparbaev kezekti apparattyq keńeste aýdan ákimderiniń saladaǵy investitsiia tartý oiynsha álsiz jumystaryn synǵa aldy, dep habarlaidy "Ult aqparat".
Aýyl sharýashylyǵy basqarmasynyń basshysy Qairat Amanov iske asyrylǵan jobalar men aldaǵy josparlar, sondai-aq agrosektorǵa investitsiia salýǵa kedergi keltirip otyrǵan máseleler týraly jan-jaqty baiandady.
2020 jyly Jambyl oblysynda aýyl sharýashylyq salasynda 29,5 milliard teńge tartylyp, 2019 jylmen salystyrǵanda ósim 113 paiyzdy qurady
Jappy, óńirde byltyr 18 joba iske asyryldy desek, olardyń beseýi mal sharýashylyǵyn damytýǵa, altaýy – ónimdi qaita óńdeýge, tórteýi – intensivti baqtar qurýǵa, úsheýi – qus sharýashylyǵyna qatysty.
Qairat Amanovtyń oń boljamdaryna qaramastan, aimaq basshysy Berdibek Saparbaev aýdandar men Taraz qalasynyń ákimderine agrosektorǵa investitsiia tartýǵa qatysty kóptegen suraq joldady.
Investitsiialar tartý men aýylsharýashylyq tehnologiialarynyń jańa túrlerin engiziýdin mańyzdylyǵyn atap ótken oblys ákimi árbir jobany muqiiat zerdeleýdi, ony iske asyrý barysynda investordyń qandai kedergilerge kez bolyp jatqanyn anyqtaýdy jáne qoldaý kórsetýdi tapsyrdy. Berdibek Saparbaev biyl kem degende 34 milliard teńge investitsiia tartý kerektigin tilge tiek etip, tiisti tulǵalarǵa tapsyrma júktedi.
«Aýyl sharýashylyǵy salasynda investorlardy tartýǵa qatysty ahýal aýyz toltyryp aitarlyqtai emes. Agrarlyq óńir úshin 29,5 milliard teńge investitsiia óte az. Bizge sala investorlaryna degen jańasha kózqaras qajet. Bul basym baǵyttardyń biri bolýy tiis, investorlardy tartý úshin barlyq jaǵdai jasalýy kerek», - dedi óńir basshysy.
Ol jeke investitsiialardy tartý áleýmettik máselelerdi de sheshýdiń tiimdi kózi ekenin basa aitty.
«Kabinette otyryp, ózderińizdi úlken bastyq sezinbei, aýyldyq okrýgterge baryńyzdar, adamdarmen kezdesińizder. Esterińizde bolsyn, investitsiia tartýǵa investorlar emes, biz múddelimiz», - dedi Berdibek Saparbaev ákimderge.
Sonymen qatar, oblys ákimi sýarýdyń zamanaýi tehnologiialaryn engizý jáne aýyl sharýashylyǵy tehnikalary parkin jańartý boiynsha jumystardy jalǵastyrýdy tapsyrdy.
