AQSh-tyń Reseige "Ulybritaniiada reseilik burynǵy barlaýshy Sergei Skripalge himiialyq qarý qoldanǵany úshin" sanktsiia salatyny týraly habary álemdik naryqta rýbl men reseilik aktsiia jáne obligatsiialar qunyn kúrt túsirip jiberdi.
Resei valiýtasynyń dollarǵa shaqqandaǵy baǵamy 3,1 paiyzǵa quldyrap, bir dollar 65 rýbl 55 tiyn boldy. Bul - 2015 jyldyń qarashasynan bergi eń tómengi kórsetkish. 9 tamyzda Aziiadaǵy qor naryqtarynda da rýbl baǵamy tómendedi.
RTS indeksi 8 tamyzda 3 paiyzǵa arzandady. Rýbl men reseilik aktsiialar jáne obligatsiialar buǵan deiin de BAQ-ta AQSh kongresmenderi Reseidiń AQSh-taǵy sailaýǵa yqtimal kilikkenine jaýap retinde "aýyr sanktsiialar" salýdy usynǵanyn habarlaǵan soń-aq aqyryndap arzandai bastaǵan.
Kongresmender usynǵan zańǵa ózgerister jobasynda Reseidiń syrtqy qaryzyna qatysty sanktsiia salý qarastyrylǵan. Bul Resei ekonomikasyna aýyr soqqy bolyp tiiýi múmkin. Alaida, qarjy sarapshylary kongress zań jobasyn dál osy kúiinde qabyldap, oǵan prezident Donald Tramp qol qoiýy ekitalai dep esepteidi. "Syrtqy qaryzǵa qatysty sanktsiia - sońǵy tetik bolmaq. Sanktsiia korporativtik obligatsiialar men jeke adamdarǵa salynýy ábden múmkin" dedi Bloomberg agenttigine bergen kommentariinde AllianceBernstein investitsiialyq kompaniiasynyń damýshy naryqtardyń baǵaly qaǵazdary jónindegi direktory Shamaila Han.
