Qazaqstannyń strategiialyq zertteýler institýty direktorynyń orynbasary Sanat Kóshkimbaev aldaǵy Parlament sailaýynyń negizgi erekshelikterin atady, dep habarlaidy QazAqparat.
«Bul, jalpy kópten kútken jańalyq ekenin aita ketý kerek. Konstitýtsiialyq zańǵa sáikes sailaý óz ýaqytynda, óz merziminde ótkeli otyr. Bul – óte mańyzdy aspekt. Iaǵni, Qazaqstandaǵy 6 saiasi partiiaǵa alda daiyndalýǵa jaqsy ýaqyt berildi. Ekinshiden, zańǵa sáikes jastar men áielderge 30 paiyzdyq oryn bólinedi. Buǵan deiin jastar men áielderdiń daýysy jetkilikti deńgeide esepke alyna bermeitin edi. Taǵy bir másele, zańnamalyq turǵyda parlamenttik oppozitsiianyń mártebesi bekitildi. Sebebi oppozitsiialyq partiialardyń quqyǵy aldaǵy ýaqytta qorǵalyp, olardyń músheleri Májilistegi komitet tóraǵalyǵyn ielenetin boldy. Jalpy, Májiliste 7 komitet bar. Iaǵni, ol komitetterdiń basshylyqtaryna oppozitsiialyq partiianyń ókilderi keledi», - dedi Sanat Kóshkimbaev QazAqparat tilshisine telefon arqyly bildirgen pikirinde.
Sarapshynyń aitýynsha, máslihattar sailaýynyń alǵash ret partiialyq tizim boiynsha ótýi de – mańyzdy aspektilerdiń biri.
«Azamattar sonymen birge máslihatqa ózin-ózi de usyna alady. Dál qazirgi ýaqytta tek partiia óz qatarynan máslihattardaǵy oryn men jergilikti atqarýshy organdardaǵy laýazymǵa óz adamyn usyna alady. Iaǵni máslihat sailaýyna da úlken ózgerister engizildi», - dedi ol.
Eske sala ketsek, búgin Memleket basshysy Qasym-Jomart Toqaev QR Parlamenti Májilisi jáne máslihat depýtattary sailaýyn taǵaiyndaý týraly úndeý jariialaǵan bolatyn.
«Búgin men Parlament Májilisi depýtattarynyń sailaýyn taǵaiyndaý týraly Jarlyqqa qol qoidym. Ortalyq sailaý komissiiasynyń qaýlysymen barlyq deńgeidegi máslihat depýtattarynyń sailaýy taǵaiyndalady. Aldaǵy sailaý konstitýtsiialyq merzimge sáikes, 2021 jyldyń 10 qańtarynda ótedi. Barlyq saiasi partiialardyń bul sailaý naýqanyna qatysýǵa daiyndalýyna, sailaý aldyndaǵy platformasyn ázirleýine, partiialyq infraqurylymdardy jetildirýine ýaqyty jetkilikti boldy», - dedi Prezident úndeýinde.
