Abai Qunanbaiulynyń 175 jyldyǵyn atap ótý sheńberinde San-Frantsisko qalasynyń Bas qoǵamdyq kitaphanasynda Qazaqstan ádebiet men mádenietine arnalǵan bólim ashyldy, dep habarlaidy QR SIM baspasóz qyzmeti.
Otanymyz týraly materialdar endi AQSh-tyń batys jaǵalaýyndaǵy jylyna 1 millionnan astam oqyrmanǵa qyzmet kórsetetip júrgen basty kitaphanalarynyń birinde keńirek kólemde usynylatyn bolady. 1878 jyly negizi qalanǵan bul kitaphananyń qory búgingi tańda 4 millionnan astam basylymdy quraidy.
Kitaphanaǵa tarihi jáne ǵylymi-tanymdyq ádebietpen qazaq aqyndary, jazýshylar men zertteýshileriniń shyǵarmalaryn, atap aitqanda Shoqan Ýálihanov, Jambyl Jabaev, Shákárim Qudaiberdiuly, Muhtar Áýezov, Sábit Muqanov, Oljas Súleimenov jáne taǵy basqalardyń, týyndylaryn qamtityn qazaq, orys jáne aǵylshyn tilderinde jaryq kórgen shashamen 400-ge jýyq kitap tabys etti. Bastama avtorlaryń pikirinshe, kitaphanada osyndai bólimniń ashylýy jáne Abai Qunanbaiuly shyǵarmalarynyń keńirek taratylýy Amerika oqyrmandarynyń qazaq halqynyń bai mádenietine shynaiy qyzyǵýshylyǵynyń ósýine septigin tigize alady.
Atalmysh joba «Otandastar» qorynyń jáne Stenford ýniversitetiniń professory Alma Qunanbaievanyń kómegimen, sondai-aq «Meditsinalyq-innovatsiialyq tehnologiialar» atty otandyq kompaniianyń Baiqaýshy keńesiniń tóraǵasy Mihail Gýtermannyń qarjylai demeýimen Qazaqstannyń San-Frantsiskodaǵy Bas konsýldyǵy tarapynan uiymdastyryldy.
Amerikan tarapynan ashylý rásimine kitaphana direktory Tomas Fortin men San-Frantsisko qalasy máriiasynyń ókilderi qatysty.
