"Samuryq Qazyna" ókilderi Esep komitetiniń kompaniia qyzmetinen milliardtaǵan somaǵa zańbuzýshylyqtar anyqtaǵanyna qatysty pikirin bildirdi, - dep habarlaidy "Ult aqparat" syrtqy jáne ishki kommýnikatsiialar departamentine silteme jasap.
"Samuryq-Qazyna" AQ basqarýshy direktory Nurlan Rahmetovtyń aitýynsha, Esep komiteti "QTJ" jumysynda zańbuzýshylyqtar bolǵanyn anyqtaýy - qarjy basqa maqsatta jumsaldy degendi bildirmeidi.
"Qarjy igerilgende kei protsedýralar durys jasalmaǵan. Mysaly, kerekti bank kepili emes, basqa túri usynyldy, alaida, nysandy salýǵa bul esh áser etpegen - qurylys aiaqtaldy. Memleketke qarasty sektor nelikten jekemenshik kompaniialarmen básekelese almaidy? Mańyzdysy maqsatqa jetý ǵoi. Jeke kompaniialar ikemdi kelgendikten sheshimdi tez qabyldap, jumysyn isteidi. Al bizde satyp alýlar, protsedýralar jáne taǵy sol siiaqtylar jetip artylady. Biz jeke sektor siiaqty ikemdi bolmasaq, básekege qabiletti bola almaimyz", - delingen kompaniianyń habarlamasynda.
Sonymen qatar, kompaniia basshysy qordyń biýdjet qarjysyn tiimdi paidalanýdy qadaǵalaityn ókileti joqtyǵyn aitty.
"Tikelei ókiletimiz joq. Salyq tóleý jaǵynan da - bizdiń kez kelgen qorjyndas kompaniia ózinshe bólek salyq tóleýshi. Al bizdiń mindet - qarjyny alyp, QTJ-ǵa aýdarý. Biz osylai ettik, buǵan qatysty Esep komitetiniń shaǵymy joq. Osydan keiin QTJ jobany iske asyratyn kompaniia esebine aýdardy. Zańbuzýshylyqtar tap osy kompaniianyń qyzmetinen anyqtaldy. Qorda qalai kelisim jasalǵany, qandai kompaniia tańdalǵanyn kúndelikti baqylap otyratyn mehanizm joq. Basqarýshy holdingte bulai jasalmaidy da. Qorda múlde eshqandai mehanizm joq deýge de bolmaidy. Qor óziniń direktorlar keńesin qurady, olar kompaniianyń menedjementin jasaidy da, osyndai baqylaý jasai alady", - delingen qordyń habarlamasynda.
Eske salaiyq, Esep komiteti "Samruq Qazyna" jumysyna qatysty milliardtaǵan teńgege zańbuzýshylyq bolǵanyn anyqtaǵan bolatyn. Keiin, QTJ ókilderi Esep komitetiniń temirjol salýda zańbuzýshylyqtar bolǵan degeninen qatysty pikirin bildirgen edi.
