«Samuryq-Qazyna» ulttyq áleýmettik qorynda satyp alýdyń jańa tártibi ázirlendi. Bul týraly QR Premer-Ministri Álihan Smaiylov málim etti, dep habarlaidy QazAqparat tilshisi.
«Memleket basshysynyń tapsyrmasyna sáikes, adami faktordy azaitý maqsatynda memlekettik baqylaýdaǵy táýekelderdi basqarý júiesi avtomattandyrylady. Sonyń nátijesinde baqylaý jáne qadaǵalaý organdary biznestiń neǵurlym problemaly sýbektilerine shoǵyrlanady. Bul rette zańǵa baǵynatyn kásipkerlerge ákimshilik qysym tómendeidi. Básekelestik aiasyn eleýli túrde keńeitip, barlyq kásipkerler úshin shyn máninde teń múmkindikter týǵyzyp, monopoliialandyrýdy toqtatý kerek», - dedi Álihan Smaiylov elordada ótip jatqan «Atameken» ulttyq kásipkerler palatasynyń kezekten tys IH sezinde.
Onyń aitýynsha, óńirlerde shaǵyn jáne orta bizneske basymdyq berý qajet. Jáne memlekettik qoldaý sharalaryn usynýdyń tiimdiligi men ashyqtyǵyn arttyrýda jańa mindet tur.
«Samuryq-Qazyna» qorynda satyp alýdy júzege asyrýdyń jańa tártibiniń jobasy ázirlendi. Ol birinshi kezekte satyp alýdyń ashyqtyǵyn arttyrýǵa jáne ońailatýǵa, jergilikti óndirýshiler men jetkizýshilerdi qoldaýǵa baǵyttalǵan. Bul sharalar 10 myń shaǵyn jáne orta biznes sýbektisine kómektesýge múmkindik beredi. Otandyq taýar óndirýshilerden 400 mlrd teńgege shamamen 10 myń taýar pozitsiiasy satyp alynady. Odan basqa, zań júzinde ashyqtyqty arttyrý jáne jer qoinaýyn paidalaný quqyǵyn berý jáne kelisim-sharttardyń talaptaryn ózgertý rásimderin ońailatý josparlanýda», - deidi ol.
