«Samuryq-Qazyna» ulttyq ál-aýqat qory kompaniialar tobyndaǵy úzdik kompaniialardyń biri «QazAtomÓnerkásip» ulttyq atom kompaniiasy» AQ-nyń aktsiialaryn IPO-ǵa sátti shyǵardy. Bul týraly búgin ótken brifing kezinde «Samuryq-Qazyna» UÁQ» AQ Aktivterdi basqarý jáne jekeshelendirý jónindegi basqarýshy direktory Almasadam Satqaliev pen qordyń Ekonomika jáne qarjy jónindegi teń basqarýshy direktory-Basqarma múshesi Ernar Janádil málim etti, dep habarlaidy "Ult aqparat".
Dálirek aitsaq, «QazAtomÓnerkásip» kompaniiasy birjaǵa jahandyq depozitarii qolhattaryn qosymsha ornalastyrǵan.
«2018 jyldyń qarasha aiynda Qazaqstan Respýblikasy Úkimetiniń sheshimine sáikes, «QazAtomÓnerkásip» ulttyq kompaniiasynyń IPO-sy ótkizilgen edi. Ol kezde bastapqy quny bir jahandyq depozitarii qolhat úshin 13 AQSh dollar deńgeiinde anyqtalǵan bolatyn. Qorǵa tiesili kompaniialardyń 15 paiyz aktsiiasy, iaǵni, 38.9 mln aktsiia IPO-ǵa shyǵaryldy», - dep eske saldy Ernar Janádil.
Al, ótken aptada, iaǵni, 2019 jylǵy qyrkúiektiń sońynda «QazAtomÓnerkásip» AQ IPO-ǵa 3,8 jahandyq depozitarii qolhattaryn qosymsha ornalastyrǵan. Aktsiialar London qor birjasy men Astana halyqaralyq qor birjasyna shyǵarylǵan.
«Ne dál qazir, nege dál osy aktsiialar degen suraqtar kóp týyndap jatyr. Osy suraqtarǵa jaýap bere keteiin. Birinshiden, naryqtaǵy qazirgi turaqtylyq pen «QazAtomÓnerkásip» AQ sońǵy qarjylyq nátijelerine investorlar tarapynan oń kózqaras qalyptasqan jaǵdaidaǵy aktsiia quny ótken aptada tarihi maksimým deńgeiine jaqyn boldy. Iaǵni, 15-15,5 dollar diapazonynda», - deidi Ernar Janádil.
Jalpy, «Samuryq-Qazyna» ókilderi aktsiialar óte jaqsy baǵamen shyqty degen senimde. Buǵan qosymsha, halyqaralyq investorlarǵa da, jergilikti investorlarǵa da birdei qysqasha ýaqyt berildi. Degenmen de, sandarǵa toqtalsaq, qosymsha ornalastyrý jaqsy ótti dep sanaimyn. Barlyǵy 9 mln 860 myńnan asa qolhatty ornalastyrdyq. Onyń ishinde 6 mln 500 myń qolhat halyqaralyq investorlarǵa, 3 mln 360 myń qolhat jergilikti investorlarǵa berildi. Al eger birjalardyń úlesine toqtalsaq, osy jyldyń nátijelerine súiensek, London men Astana qarjy ortalyǵynyń úlesi teń: elý de elý paiyz. Ol óte jaqsy nátije», - dep atap ótti ol.
Eń bastysy, osy aktsiialardy satý elimizge 128 mln dollar qosymsha qarajat kirgizgen. «Ol qarajattyń barlyǵy «Samuryq-Qazyna» kompaniialar tobynda qalmaidy. Biz onyń barlyǵyn jaqyn arada Ulttyq qorǵa aýdaramyz», - deidi «Samuryq-Qazyna» basqarma múshesi Ernar Janádil.
