"Samuryq-Qazyna" qorynyń basshysy Almasadam Satqaliev Prezident Qasym-Jomart Toqaevtyń synynan keiin jelide post jariialady, dep habarlaidy "Ult aqparat".
«Búgin, Memleket basshynyń tapsyrmasyna orai «Samuryq-Qazynanyń» aldynda úlken múmkindik týyp otyr – qoǵamda qyzý talqylanyp jatqan reformalardy júzege asyrý.
Reformalaý baǵdarlamasyna naqty, ári tiimdi usynystar bere alatyn azamattarmen dialog ornatýǵa daiynbyz. Jýyq arada bul josparlar bizdiń korporativtik saitqa, jáne basqa da ashyq kózderge jariialanatyn bolady. Biz barlyq saýaldarǵa jaýap beremiz. Ózgeristi ózimizden bastap, ashyqtyq, esep berý, bizneske kedergi keltirmeý, áleýmettik jaýapkershilik jáne sybailas jemqorlyqpen kúres qaǵidattaryn negizge alyp otyrmyz.
«Samuryq-Qazyna» Qazaqstan Respýblikasy azamattaryna Qor aktivterin tikelei ielenýge múmkindik bermek. Iaǵni, ult bailyǵyn ádil túrde barsha halyqqa úlestirip berý – bizdiń basty maqsatymyz. Biz biznes-protsester men Qordyń kompaniialar tobyndaǵy korporativtik basqarý tájiribesin reformalaýdy usynamyz. Esep berý men basqarý tetikteri basqasha bolady. Munai, gaz, kómir, tasymaldaý men uqsatý, elektrqýatyn óndirý, telekommýnikatsiialar jáne basqa da salalardaǵy qatynastardy jańalaýǵa bet alamyz.
Satyp alýlar júiesin túbegeili ózgertip, otandyq taýar óndirýshiler men shaǵyn jáne orta biznesti qoldaý mehanizmderin kúsheitemiz. Olardy bir pysyqtap alý úshin sársenbi kúni, 26-shy qańtarda biznes-qoǵamdastyqpen ashyq dialog uiymdastyrylady. Áleýmettik jelilerde onyń tikelei transliatsiiasy júrgiziledi.
Birlesip jasalǵan reformalaý baǵdarlamasy bekitilse, ony iske asyryp, qatań oryndaýǵa bar kúshimdi salamyn. Konstrýktivti ári naqty usynystaryńyzdy bizdik korporativtik poshtaǵa joldaýlaryńyzdy suraimyn - usynys@sk.kz» - dep jazdy qor basshysy.
