Sailaý biýlletenderine «bárine qarsymyn» degen jazýdyń engizilýi – demokratiianyń naǵyz tóri dese bolady, sebebi kóptegen memlekette mundai pýnkt joq. Búgin QR Prezidenti Qasym-Jomart Toqaevtyń VII shaqyrylymyndaǵy Parlament sessiiasynda sóilegen sózine qatysty saiasattanýshy Nurtaza Samat osyndai pikir bildirdi, dep habarlaidy QazAqparat.
«Memleket basshysynyń aitqan sózine qatysty eki másele kóńilimnen shyqty. Onyń birinshisi, Prezidenttiń «Saiasi partiialardyń Májiliske ótý shegin 7%-dan 5%-ǵa tómendetýimiz kerek. Osyndai sheshimdi qabyldaityn ýaqyt keldi, óitkeni atalǵan norma zań júzinde tirkelgen partiialardy aldaǵy sailaýlarǵa qatysýǵa yntalandyrady» dep aitýy. Meniń oiymsha, bul – demokratiianyń jemisi. Mundai sheshim Qazaqstannyń saiasi arenasynda jańa partiialardyń paida bolýyna, qoǵamda liberalizm men demokratiianyń paida bolýyna sebepker bolady. Bul – birinshi másele», - deidi saiasattanýshy Samat Nurtaza.
Ol Memleket basshysy kótergen máseleler ishindegi kóńilinen shyqqan taǵy bir máselege toqtalyp ótti.
«Ekinshiden, Memleket basshysy «Bizdiń basty maqsatymyzdyń biri – adam quqyqtaryn tolyq qorǵaý. Bul rette, azamattardyń tańdaý erkindigin barynsha qamtamasyz etý óte mańyzdy. Álemdik tájiribede adamnyń qandai da bir sailaýǵa kelispeitinin nemese úmitkerlerdiń bárine qarsy ekenin zańdy túrde bildirý quqyǵy keńinen qalyptasqan. Shyn máninde, balamaly pikir jáne bárine qarsy daýys berý uǵymy biz úshin de qalypty nárse bolýǵa tiis. Sondyqtan, barlyq deńgeidegi sailaý biýlletenderine «bárine qarsymyn» degen jazý engizgen jón. Bul bastama azamattardyń sailaý quqyǵyn qorǵaýǵa jaǵdai jasaidy» dedi. Bul – demokratiianyń naǵyz tóri dese bolady, sebebi kóptegen memlekette mundai pýnkt joq. Iaǵni, ne sailaýda áldebir kandidatty tańdaisyń nemese biýlletendi qurtasyń. Barlyq deńgeidegi sailaý biýlletenderine «bárine qarsymyn» degen jazýdyń engizilýi – memleket ózine qansha adam qarsy ekenin anyqtap, óz qateligi boiynsha jumys isteýge múmkindik beretin óte durys sheshim. Osy pýnktiń bar bolýy Qazaqstan Respýblikasyn barlyq demokratiia memleket arasyndaǵy bedelin joǵarylatyny sózsiz», - deidi ol.
