Májilis depýtaty Samat Musabaev Jańaózen qalasyndaǵy máselelerdi sheshýge qatysty Úkimet basshysy Álihan Smaiylovtyń atyna saýal joldady, dep habarlaidy QazAqparat.
«Qara altyndy» igerý arqyly elimizdiń damýyna eleýli úles qosyp otyrǵan bul shahar, Qazaqstan demografiiasynyń qarqyndy ósýine de oń yqpal etip otyr. 2001 jyly qala turǵyndarynyń sany 66 myń adam bolsa, 2022 jyldyń basynda 163 myńǵa jetti. Iaǵni jiyrma jylda turǵyndar sany 100 myń adamǵa kóbeigen. Biraq, halyq sany kóbeigenimen, óndiris oshaqtary damymai, turǵyndardy jumyspen qamtý eń ózekti máselege ainaldy. Qazirgi tańda, Jańaózen qalasyndaǵy jumyssyzdar sany 8 myń adamnan asqan. 2011 jylǵy Jańaózen oqiǵasynan keiin Úkimet tarapynan munaishylar qalasyn damytýǵa arnalǵan keshendi jospar qabyldandy. Jospar aiasynda qyrýar qarjy bólinip, qaladaǵy úilerdiń syrty jeńil-jelpi árlenip, ár jerden injenerlik jeliler aýystyrylyp, kóshede abattandyrý jumystary júrgizildi. Biraq, bul sharalar túbegeili Jańaózen qalasyndaǵy qordalanyp qalǵan suraqtardy sheshken joq. Al, Mańǵystaýda «QazMunaiGaz» AQ qaraityn munai-gaz kompaniialaryna jumysqa alýǵa qatysty moratorii jáne jumysshylardy 5/50 baǵdarlamasymen jumystan shyǵarý jalǵyz Jańaózen qalasynda emes, búkil oblys deńgeiinde áleýmettik jaǵdaidy ýshyqtyryp jiberdi», - dedi S. Musabaev Májilistiń jalpy otyrysynda.
Onyń aitýynsha, 2019 jyly Úkimet «Atameken» Ulttyq kásipkerlik palatasymen birlesip, «Ózenmunaigaz» aktsionerlik qoǵamnyń syrttan importtalatyn taýarlar, jumystar jáne qyzmetterdi Jańaózen qalasynda oqshaýlaý boiynsha jumystardy bastaǵan. Negizgi maqsaty - jumys nysandaryn Jańaózen qalasynda salý jáne 100% jańaózendikterdi jumysqa alý bolatyn. Alaida, bul jobalar «Ózenmunaigaz» ben «Samuryq Qazyna» qorynyń tarapynan biýrokratiialyq kedergilerge tap bolyp, nátijesinde ideia, tek jaqsy ideia bolyp qaldy da, jumys oryndary sol kúii ashylǵan joq.
«Taǵy bir másele. Jańaózen qalasynda 2011 jyldan beri memleket esebinen 1 sharshy metr turǵyn úi salynbady. Kerisinshe, Úkimettiń saiasaty qala halqyn basqa óńirlerge kóshirý boldy. Biraq, ol oń nátije bergen joq», - dedi ol.
Osy oraida ol óńirge qatysty kelesi sheshimderdi usyndy:
1. Jańaózen qalasyndaǵy jumyssyz azamattardyń naqty tizimin jasaqtaý jáne ol ashyq bolýy úshin tsifrlyq platformaǵa engizý.
2. Jaqyn arada jumyssyzdyq máselesin sheshý úshin «Ózenmunaigazǵa» qyzmet kórsetip otyrǵan 7-8 servistik kompaniia ainalasynan aýtsorsing mekemelerdi quryp, áleýmettik jaǵdaiy tómen azamattardy jumyspen qamtý.
3. Tiisti mamandyǵy bar jumyssyz azamattardy Mańǵystaý oblysyndaǵy jáne basqa óńirlerdegi kompaniialarǵa jumysqa ornalastyrý múmkindigin qaraý.
4. Jańaózendi keshendi damytý úshin qalanyń bas jospar men egjei-tegjeili jospar jobasyn ázirlep, jańa qala qurylysyn Kendirli baǵytyna qarai salýdy qolǵa alý.
5. Jańaózen óndiristik aimaǵynda «Arnaiy ekonomikalyq aimaq» quryp, kásipkerliktiń damýyna tyń serpilis berý.
6. Mańǵystaýda ashýǵa josparlanyp otyrǵan sheteldik joǵary oqý orynynyń filialyn Jańaózen qalasynda ashý.
7. «Ózenmunaigaz» AQ-nyń importyn oqshaýlaý jobasyn iske asyrý úshin tiisti Erejeni naýryz aiyna deiin bekitip, sáýir aiyna deiin jobaǵa qatysatyn jergilikti kompaniialardy anyqtaý jáne olardyń jobalaryna jan-jaqty qoldaý kórsetý.
8. Jańaózen qalasynda qandai da bir kásip ashýǵa niettengen azamattarǵa, ekinshi deńgeili bankter men basqa da qarjylyq institýttardan paiyzdyq mólsheri jeńildetilgen kólemde nesie berýdi jolǵa qoiý.
9. Búgingi tańda Ózenmunaigazǵa tiimdi jumys isteýge múmkindik bermei otyrǵan «Samuryq-Qazyna» ulttyq ál-aýqat qorynyń jumysyndaǵy jasandy ákimshilik kedergilerdiń barlyǵyn joiý.
10. «Ózenmunaigaz» aktsionerlik qoǵamy jyl saiyn Jańaózen qalasynyń áleýmettik-ekonomikalyq damýyna 750 mln teńge kóleminde qarjy bólip keledi. Bul «Ózenmunaigazdyń» munaidan túsetin jyldyq paidasynyń 0,5% ǵana ekenin eskere otyryp, qalanyń áleýmettik-ekonomikalyq máselelerin sheshýge bólinetin qarjynyń kólemin kem degende birneshe esege deiin ulǵaitý qajet.
11. Prezident tapsyrmasyna sáikes, Mańǵystaý óńirine qatysty qurylǵan Úkimettik komissiia jumys nátijeli atqarýy kerek.
«Eń bastysy halqy jyl saiyn ósip kele jatqan Jańaózenniń taǵdyryna Úkimet beijai qaramaýy tiis dep esepteimiz», - dedi Samat Musabaev.
