Foto: gov.kz
Ulttyq qaýipsizdik komiteti tóraǵasynyń burynǵy birinshi orynbasary Samat Ábishke qatysty istiń qozǵalǵanyna biraz boldy. Bul týraly Bas prokýrordyń orynbasary Áset Shyńdaliev málimdedi, dep habarlaidy Sputnik Qazaqstan.
"Meniń málimetimshe, Samat Ábishtiń isi qozǵalǵanyna biraz boldy. Biraq naqty qashan qozǵalǵanyn, datasyn qazir aita almaimyn. Zań boiynsha tergeý organdary iske qatysty aqparatty qashan beretinin ózderi sheshedi", - dedi Shyńdaliev Májilis kýlýarynda jýrnalister suraǵyna jaýap berip.
Onyń aitýynsha, Ábish "Qańtar oqiǵasy" kezinde laýazymdyq ókilettigin asyra paidalandy degen kúdikke ilinip otyr. Ábish qazir Qazaqstanda, odan eshqaida ketpeý týraly qolhat alyndy.
Osy oraida jýrnalister "eshqaida ketpeý týraly qolhat" alynǵan kezde arnaiy kúzet qoiyla ma dep surady.
"Eshqaida ketpeý týraly qolhat alynǵanda, úidiń aldynda (Samat Ábishtiń úii – red.) qaraýyl turmaidy. Ol óz úiinde turady. Tergeý shaqyrǵanda, ózi keledi. Advokattarymen kezdese alady. Arnaiy qaraýyl úiqamaq kezinde ǵana qoldanylady", - dep túsindirdi Shyńdaliev.
Aita keteri, Samat Ábish – Tuńǵysh Prezident Nursultan Nazarbaevtyń nemere inisi. 2015 jyldan bastap "Qańtar oqiǵasyna" deiin, iaǵni 2022 jyldyń qańtaryna deiin Ulttyq qaýipsizdik komiteti tóraǵasynyń birinshi orynbasary qyzmetin atqarǵan.
Esterińizge sala keteiik, "Qańtar oqiǵasynan" keiin Ulttyq qaýipsizdik komitetiniń burynǵy tóraǵasy Kárim Másimov pen onyń orynbasarlary ustaldy. Artynsha olarǵa sot úkimi shyqty. Másimov múlki tárkilenip, 18 jylǵa bas bostandyǵynan aiyryldy. Al Másimovtiń orynbasary bolǵan Samat Ábish qyzmetinen bosatyldy, onyń ústinen qylmystyq is qozǵalǵan joq.
