Sońǵy aptalarda Aýdandyq Memlekettik kirister basqarmalary (MKB) kásipkerlerdi tyńdaýǵa shaqyryp, jospardan tys salyq tekserýlerin taǵaiyndaý týraly aldyn ala sheshimder shyǵaryp jatyr. Zańger Ǵabitjan Qudaibergen mundai jaǵdaida kásipkerler neni eskerýi keregin túsindirdi, dep habarlaidy ult.kz.
Zańgerdiń aitýynsha, MKB-nyń áreketi buryn berilgen kameraldyq baqylaý habarlamasynyń tiisinshe oryndalmaýyna bailanysty bolýy múmkin. Kei jaǵdailarda kásipkerlerge salyq tekserýin júrgizý týraly daiyn nusqama da berilip jatyr.
Ǵabitjan Qudaibergen mundai qujat alǵan kásipkerlerge birden barlyq suratylǵan qujattardy berýge asyqpaýǵa keńes berdi. Onyń sózinshe, aldymen salyq organynyń mundai tekserýdi taǵaiyndaýǵa ókilettigi bar-joǵyn anyqtaý qajet.
Qujattardy bir kúnde talap etýge bola ma?
Zańgerdiń aitýynsha, keibir jaǵdaida MKB kásipkerlerden qujattardy bir kún ishinde usynýdy talap etedi.
«Salyq organdary qujattardy qysqa merzimde talap etip, jasandy túrde asyǵystyq týǵyzady», – deidi ol.
Ǵabitjan Qudaibergenniń málimetinshe, resmi salyq tekserýi kezinde qujattardy usyný úshin zańda keminde 10 jumys kúni beriletin jaǵdailar bar.
Sondyqtan kásipkerden qujattardy bir kún ishinde talap etken jaǵdaida, onyń qandai quqyqtyq negizge súienip otyrǵanyn naqtylaý mańyzdy.
Aýdandyq MKB-nyń tekserý taǵaiyndaýǵa quqyǵy bar ma?
Zańger bul máselede 2025 jylǵy 31 qazandaǵy №659 buiryqpen bekitilgen qaǵidalarǵa nazar aýdardy.
Onyń aitýynsha, atalǵan qujattyń 6-tarmaǵyna sáikes, kameraldyq baqylaý nátijesinde anyqtalǵan buzýshylyqtardy rastaýǵa bailanysty tekserý taǵaiyndaý týraly sheshim qabyldaý aýdandyq MKB-nyń quzyretine jatpaidy.
Zańgerdiń túsindirýinshe, mundai sheshim qabyldaý quqyǵy Memlekettik kirister departamentterine (MKD) berilgen.
Osyǵan bailanysty kásipker aldymen tekserý týraly sheshimdi qai organ shyǵarǵanyn jáne sol organnyń tiisti ókilettigi bar-joǵyn tekserýi qajet.
Kásipker ne isteýi kerek?
Ǵabitjan Qudaibergen mundai jaǵdaida birneshe qadamdy usyndy.
1. Tyńdaý kezinde qarsylyq bildirý
Eger kásipker tyńdaýǵa shaqyrylsa, salyq organynyń áreketine qatysty óz qarsylyǵyn resmi túrde bildirý qajet. Zańger óz ustanymyn aýdioǵa jazyp, hattamaǵa engizýdi suraýǵa keńes beredi.
Atap aitqanda, kásipker №659 buiryqqa sáikes MKB-nyń tekserý taǵaiyndaýǵa quzyreti bar-joǵyn kótere alady.
2. Prokýratýraǵa shaǵymdaný
Eger salyq organy kásipkerdiń ýájderin eskermei, qysqa merzimde qujat talap etip, tekserýdi taǵaiyndaýdy jalǵastyrsa, zańger prokýratýra organdaryna shaǵym túsirýdi usynady.
3. Ákimshilik sotqa júginý
Eger kásipkerge salyq tekserýin júrgizý týraly nusqama berilip qoisa, ony ákimshilik sot tártibimen daýlaýǵa bolady.
Zańgerdiń aitýynsha, mundai jaǵdaida nusqamany shyǵarǵan organnyń ókilettigi máselesin sotta kóterý mańyzdy.
