Qosylǵan qun salyǵyn ákimshilendirýde Blockchain-tehnologiiasyn engizý josparlanyp otyr. Bul týraly Úkimet otyrysynda QR Qarjy ministri Erulan Jamaýbaev aitty, dep habarlaidy QazAqparat.
«Memleket basshysynyń tapsyrmasyna sáikes Eńbek jáne halyqty áleýmettik qorǵaý ministrligimen ashylǵan jumys oryndary jáne jumysqa ornalastyrylǵan azamattar týraly málimetterdi elektrondyq túrde qabyldaý qamtamasyz etiledi. Jaqynda biýdjetten, onyń ishinde Jumyspen qamtý jol kartasy aiasynda qarjylandyrylǵan memlekettik baǵdarlamalardyń qatysýshylaryn qashyqtyqtan baqylaý jáne taldaý kúsheitiledi», - dedi ol.
Ministrdiń aitýynsha, salyqty ákimshilendirýdi ońtailandyrý jáne jeńildetý boiynsha keshendi sharalar qabyldanýda. Olar taýarlardy baqylaý júiesin, taýarlarǵa ilespe júkqujattar men elektrondyq plombalardy engizýdi qamtidy. Bul kontragentter arasyndaǵy iske asyrýdyń ashyqtyǵyn qamtamasyz etedi.
«Budan basqa, qosylǵan qun salyǵyn ákimshilendirýde Blockchain-tehnologiiasyn engizý josparlanýda. Bul salyq tóleýden jaltarý táýekelin aitarlyqtai tómendetedi jáne qolma-qol aqsha alý jónindegi mámilelerdi qysqartady», - dedi Erulan Jamaýbaev.
