Taldyqorǵandaǵy Til saraiynda Qazaqstan Respýblikasy Parlamenti Májilisiniń Qarjy jáne biýdjet jónindegi komitetiniń kóshpeli otyrysy ótti. Onda salyq salýdy jetildirý men ashyqtyǵyn qamtamasyz etý arqyly ekonomikany damytýdyń belsendiligin arttyrý týraly máseleler talqylanady.
Alǵashqy sózdi Qazaqstan Respýblikasy Parlamenti Májilisiniń Qarjy jáne biýdjet jónindegi komitetiniń tóraiymy Gúljan Qaraǵusova alyp, jiynnyń maqsaty men mańyzy jaily aityp ótti.
Munan soń sóz alǵan oblys ákimi Amandyq Batalov depýtattarǵa qysqasha oblystyń áleýmettik-ekonomikalyq damýy, salyq túsimderiniń jaǵdaiy týraly baiandap berdi.
- Sońǵy úsh jyldyń ishinde jergilikti biýdjet túsimi 51 protsentke ósip, 2016 jyly 139,8 mlrd. teńgeni qurady. Oblystyń jalpy memlekettik biýdjettegi jergilikti biýdjetke túsim úlesi 2013 jyly 37,2 protsentten 2016 jyly 52,8 protsentke jetti nemese sońǵy úsh jylda 15,6 protsenttik pýnktke ósti, - dedi A. Batalov. Sonymen qatar osy jiynda talqylanyp otyrǵan salyqtyq ákimshiliktiń tiimdiligi men sapalylyǵyn arttyrý isi óz kezeginde halyqtyń kóptegen áleýmettik-ekonomikalyq máselelerin sheshýge, biznesti taza júrgizýge yqpal etetinin de atap ótti. Munan soń oblystyń damýy týraly shaǵyn beinefilm kórsetildi.
Jiynda salyq salýdy jetildirý men ashyqtyǵyn qamtamasyz etý arqyly ekonomikany damytýdyń belsendiligin arttyrý máselesi týraly baiandamamen QR Ulttyq ekonomika birinshi vitse-ministri Rýslan Dalenov, QR Qarjy ministrligi Memlekettik kiris komiteti tóraǵasynyń orynbasary A.Qypshaqov, QR Parlamenti Májilisiniń Qarjy jáne biýdjet jónindegi komitetiniń múshesi S.Simonov pen Almaty oblysy ákiminiń orynbasary Jeńis Tuiaqov sóz aldy.
J. Tuiaqov jergilikti jerlerdegi jaǵdailardy eskere otyryp, salyq salý isin jetildirý baǵytynda usynystaryn jetkizdi. Máselen, qazirgi kezde talqylanyp jatqan jańa salyq kodeksiniń jobasynda 2017 jyldyń 1 qańtarynan shaǵyn kásipkerlik sýbektileri úshin ai saiynǵy áleýmettik tólem engizý qarastyrylǵan. Búgingi kúni bul tólem jylyna eki ret jasalyp otyr. Al jańa talap engiziletin bolsa tólem kezinde ustalatyn bank komissiiasynyń shyǵyny edáýir ósip, bul óz kezeginde shaǵyn jáne orta bizneske qosymsha júk bolmaq. Osyndai basqa da óz usynystaryn jetkizgen J. Tuiaqov jalpy salyq kodeksiniń ózgeristeri men tolyqtyrýlaryn qoldaitynyn jáne bul igi sharalar salyq bazasynyń kóbeiýine óz yqpalyn tigizetinine senim bildirdi.
Budan ári kezdesý negizgi taqyrypty ortaq talqylaýmen jalǵasty.
Búgin depýtattardyń oblysqa sapary jalǵasyp, delegatsiia Kóksý qant zaýytynyń, «Karimov» sút-taýarly fermasynyń jumystarymen tanysty, oblys ortalyǵyndaǵy «Taldyqorǵan» indýstrialdy aimaǵyn aralap kórdi. Sondai-aq «Jastar» mádeni-demalys saiabaǵynda, Oqýshylar saraiynda boldy.
