Elimizde «Salyq ámiiany» jańa servisi iske qosylmaq. 2020 jyldyń 1 qańtarynan bastap júzege asyrylatyn jańa bastama jaiynda QR qarjy vitse-ministri Rýslan Eńsebaev aityp berdi.
«Astana Hub» Halyqaralyq IT-startaptar tehnoparki alańynda tanystyrylǵan jańa júie salyqty elektrondy túrde tóleý protsesin jeńildetýge múmkindik berdi. Sonymen qatar serviste qandai salyq tóleý qajet ekendigi, aiyppul men ósimder týraly naqty aqparat qamtylǵan. Sondai-aq, salyq tóleýshi ózine qandai salyq salý nysandary tirkelgenin bile alady.
«Jańa qyzmet salyq tóleýshige onyń aǵymdaǵy jáne aldaǵy biýdjettik mindettemeleri týraly aqparat beredi. «Salyq ámiianynan» túsken aqsha avtomatty túrde salyq mindettemeleri týyndaǵan tiisti salyqtarǵa esepteledi. Sonymen birge salyq tóleýdiń derektemeleri salyq tóleýshi kórsetpei-aq avtomatty túrde toltyrylady. Bul salyqtyń kepildi jetkizilýin qamtamasyz etedi», – dedi QR qarjy vitse-ministri Rýslan Eńsebaev.
Bul jańa qyzmet qarajattardy jalpy málimettermen tolyqtyrýǵa, «salyq ámiianynyń» balansynan avtomatty túrde aqsha aýdarý baǵytyna qosýǵa jáne tólengeni jónińde habarlama alýǵa múmkindik beredi.
Salyq ámiianynyń mobildi nusqasy e-Salyq mobildi qosymshasynyń platformasynda jumys jasaidy. Elektrondyq úkimet portalynda (egov.kz) jáne jeltoqsan aiynyń sońynan bastap «Qazaqstan Halyq Banki» AQ (Homebank) mobildi qosymshasyna engizilemek. Al, 2020 jyldan bastap bul qyzmet Kaspi.kz mobildi qosymshasyna da enetin bolady.
Sonymen qatar, jiyn barysynda Open API formatyndaǵy qyzmetter tanystyryldy. Bul IT-kompaniialar úshin ámbebap interfeis, onyń kómegi arqyly ázirleýshi ekinshi deńgeidegi bankke qosyla alady jáne ózine qoljetimdi derektermen ózara bailanystyra otyryp jańa ónim jasai alady. Mysaly, klienttiń kelisimimen klienttiń túrli bankterdegi shottary týraly aqparatqa biryńǵai ruqsat bere alady.
2020 jyldyń basynan bastap, QR Qarjy ministrligi Memlekettik kirister komitetiniń saitynda «Ortalyqtandyrylǵan biryńǵai jeke shottar» AJ salyq bereshegi, tólengen jáne aldaǵy tólemder týraly málimetter usyný úshin API qyzmetteri jariialandy.
Búginde elektrondy memlekettik satyp alý veb-portaly arqyly málimetterdi berý boiynsha 60-tan astam memlekettik engizilip, 40-qa jýyq uiym osy API qyzmetterine qol jetkizgen.
