17 mamyr kúni Astana ekonomikalyq forým aiasynda álemniń ekologiialyq máselelerine bei-jai qaramaityn otandyq ári shetel sarapshylary Nur-Sultan qalasynda bas qosty. Beldi mamandar Qazaqstan men Ortalyq Aziia elderinde jasyl ekonomikany damytýdyń tiimdi joldaryn talqyǵa aldy.
Paneldik sessiiany uiymdastyrýshylardyń biri - “Astana” halyqaralyq qarjy ortalyǵy. Sessiiaǵa qatysýshylar arasynda Nobel syilyǵynyń laýreaty Rae Kvon Chýng, Energetika vitse ministri Sábit Nurlybai, IýNIDO energiia bóliminiń direktory Tarek Emtaira, Dhahran Technology Development Company bas direktory Kreig Smit, “Astana” halyqaralyq qarjy ortalyǵy (AHQO) Ákimshiliginiń direktory Aidar Qazybaev, "Jasyl ekonomikaǵa ótý" boiynsha Keńes múshesi Saltanat Raqymbekova jáne ózgeler boldy.
Otandyq jáne halyqaralyq sarapshylar jasyl ekonomikaǵa investitsiia tartý, turaqty energetikanyń qoljetimdiligi, ekologiialyq ahýaldy jaqsartý jáne ózge de máseleler tóńireginde óz oilaryn ortaǵa saldy. IýNIDO energiia bóliminiń direktory Tarek Emtaira jasyl ekonomikany damytý úshin infraqurylymǵa zor mán berý kerektigin sóz etse, AHQO Ákimshiliginiń direktory Aidar Qazybaev Qazaqstandaǵy jasyl ekonomika máselesine toqtalyp, elimizde atalmysh salany damytý úshin qandai kedergiler bar ekenin tizip berdi.
“Qazaqstanda balamaly energiiany qoldaný kórsetkishi 1 paiyzdan aspaidy. Al basqa elderde bul kórsetkish 70 paiyzdy qurap otyr. Men osydan bir jyl buryn Finliandiiada mynadai málimettiń kýási boldym. Olar dúniejúzinde aýanyń tazalyǵy boiynsha birinshi orynda turmyz deidi. Al Qazaqstan dál sondai baspasóz konferentsiiasynda múlde basqa salalar boiynsha kósh bastap turǵanyn málimdedi.
Qazaqstan burynǵy postkeńestik el bolǵandyqtan, ekonomikany damytýdyń jalpyǵa birdei damý jolyn tańdaǵan. Iaǵni, taýardy óndiredi, sosyn ony tutynady, keiin qaldyqtardy laqtyrady nemese kómedi. Basqasha aitqanda qoqystyń astynda qalyp jatyrmyz. Sondyqtan bizge qaita óńdeý salasyn qolǵa alyp, osy salaǵa bet burý kerek”, - dedi Aidar Qazybaev.
“Jasyl ekonomikaǵa ótý" boiynsha Keńes múshesi Saltanat Raqymbekova Aidar Qazybaevtyń sózine qosyla otyryp, bul máseleni sheshýde AHQO súbeli úles qosatynyna senim bildirdi.
“Aidardyń sózin jalǵastyra otyryp, men AHQO-nyń jasyl qarjyny damytý jolyndaǵy provaiderge ainalýy tiis ekenin aita ketkim keledi. Jasyl ekonomikany damytý úshin tsifrovizatsiianyń mańyzy zor... Osy oraida, Jasyl tehnologiialar ortalyǵynyń kómegimen biz elimizdegi jasyl energetikanyń deńgeiin kóteretin bolamyz. Bizde jaqsy paltforma bar jáne biz ony damyta túsýimiz kerek”, - deidi Saltanat Raqymbekova
