Jas aqyn Saltanat Madiiarqyzynyń bir top óleńin oqyrman nazaryna usynamyz. Taǵdyrdyń synyna ushyrasa da, qaiyspai qolyna qalam ustap, ómirin óleńge ainaldyrǵan aqyn qyzdyń shyǵarmashylyǵy sizderdi bei-jai qaldyrmaidy degen úmittemiz. Marhabat!
BIR ÚMIT
Bir úmit bar tańymdy jaryq qylǵan,
Sol bir úmit sónbeitin alyp nurdan.
Sábidiń sezimindei senimime
Fánidiń ótkinshisin san uqtyrǵan.
Sátterde kei senimder sel keshetin,
Bir úmit bar kúdikpen beldesetin.
Syndar qatty bolsa da óte, meili
Sol bir úmit tek alǵa jeteleidi.
Jalǵannyń jalǵandyǵy júdetse de,
Bir úmit bar júrekti meken etken.
Taǵdyr keide muńdaryn údetse de,
Sol bir úmit senimdi eseletken.
Jai otyndai jarq etip qalatuǵyn,
Joq men úshin odan úlken biik beles.
Jaratqannyń meiiriminen bolatuǵyn,
Sol bir úmit sónýge tiisti emes!
JOLAÝShYMYZ
(...ǵa)
Ótpeli ǵumyr - ótkelsiz ózen.
Júzip ótýge tiispiz!
Kedergilerdiń alyp qamalyn buzyp ótýge tiispiz.
Senimniń kólin lailap almai, tunyq etýge tiispiz.
Batpaqtarmen de,
Soqpaqtarmen de júrip ótýge tiispiz.
Jolaýshylarmyz
Kelemiz birge, kóremiz birge barlyǵyn.
Birimiz erte, birimiz keshteý
Bóligin, iaki, qaldyǵyn.
Shamaǵa qarai júkterimiz bar, mindet qyp basta júktegen.
Jolaýshylarmyz
Bul uly sapar!
Jolymyz áli bitpegen.
Bul qyzyq sapar
Qiyndyǵy bar, jeńildigi bar kóptegen.
Tosyn jailar bar, biz oilamaǵan, oilai da almaǵan, kútpegen.
Joldar bar munda taram da taram, júrgen izderi keppegen.
Bizderdiń uly armanymyz bar, baǵytymyz bar bettegen!.
Jolaýshylarmyz
Jolyqty bizge túrli saparlas
Aitsaq, aiyp etpeńder.
Aýyrdyń ústimen, jeńildiń astymen ótkender,
Ýádeni úiip-tógip, sertinen taiyp ketkender,
Synaqqa tússe súrine ketpei, sabyryn serik etkender,
Mańdai terimen eńbek etip, asyna adal jetkender,
Olarǵa so-o-ndai madaq aitardai Kók pen Jer
Maqtansúigish, tákappar, zalym óktemder.
Óli balyqtai júze almaǵan, aǵyspen birge ketkender.
Ózin ózi de tani almai ketken, ylǵi betperde kigender,
Ǵashyq jandar
kúmánsiz senip, súigender,
ózderi jyǵylyp jatyp, súringen janǵa kúlgender.
Ketkende ókinip qalmaý úshin, azyǵyn jinap júrgender,
Alańsyz júrip kúlgender menen báriniń
Baiansyzdyǵyn bilgender.
Muń jebesimen jaralap ketken, Saǵynysh súigen mergen Kúz.
Ekpeniń bárin ýaqyttan alyp, ókpeniń bárin kómgenbiz.
Kúdikti jeńip, baqytqa nanyp, úmitke appaq ergenbiz.
Egilip, senip,
Jeńilip, jeńip
Ómirde "ómir" kórgenbiz...
Azabyn qoishy, kórmegen kimder?!
Mazaǵyna da kóngenbiz.
Ǵajabyna da sengenbiz!
Synaq dep úlken, qonaqpyz júrgen
Qaitý úshin kelgenbiz.
DOSYMA
"Tákappar" dep aitady eken bireýler,
Aita bersin. Bilmeidi ǵoi men jaily.
Meń-zeń kúi de shyǵyn sózdi únemder.
Sezinbegen shyǵar olar ondaidy.
Sharasyzdyq shyrmaýynda sóilesem,
Batyldyq joq daýystaǵy dirilde.
Men qýansam, tek muńaia kórme sen!
Qýanyshym úshin de bir kúlimde.
Sebep tappai júrgender bar qulatýǵa,
Bilsin solar, sónbeidi bir úmit tek!
Men jylasam tyryspa jubatýǵa,
Únsiz otyr nemese burylyp ket!
Kúmániń bolmas, sirá, dostyǵyma?
Sátterdi aita alamyn unamaǵan.
Men ózgeniń baqyty, shattyǵyna
Qyzǵanyshsyz, shynaiy qýana alam.
Kórsetpe erejeme qarsy qylyq.
Muńaimaimyn, eger sen kúlimdeseń.
Kedergige qasqaiyp qarsy turyp,
Taǵdyryma til tigizbei ǵumyr keshem!
Syrtymnan sóz aitpa múlde sen shyǵyp,
Bilesiń ǵoi, jek kóremin ondaidy!
Júzime ait, kórip tursań kemshilik,
Ózgelerden estý jeńil bolmaidy.
Qaiǵyń bolsa, bólis! Saǵan jeńil bolsyn.
Men muńaǵan sátte, biraq, kúlmeisiń.
Dostyqtyń irgetasy senim bolsyn.
Senimnen bir shyqsań, qaita kirmeisiń.
Qajettilik joq mende betperdege.
Tórde ólgen jandar da kórge enedi.
Qalasań, men súringen sátterde de
Sóge ber. Tek, músirkei kórme meni!
BIZDIŃ JAQQA KESh KELEDI KÚZ DEGEN
(...ge)
Aýlamyzda san alýan gúlder bar.
Bizdiń jaqqa kesh keledi kúz degen.
Jaz sońynda qimai sanap kúnderdi ár,
Menmin kúzdi izdegen.
Japyraq she?
Kúz kelgenin qalai ma?
Kúzdi kútý ádetim be tek meniń?
Kútip júrgen mezgilimniń alaida
Ańǵarmai da qalam kirip ketkenin.
Men gúlderge janymmenen jaqynmyn.
Gúl sekildi kúzde óle me endi úmit?!
Aýladaǵy gúldi qimai otyrmyn,
Terezege telmirip.
Óz-ózimnen oi ishinde úzdigem,
Aq muńymdy sary túske boiaimyn.
Unatpaimyn...
Jo-joq, súiem kúzdi men!
Gúldi qimai, japyraqty aiaimyn.
Aita almaimyn oiymdy bir adamǵa,
Kúz kóńildi Qiiametke burady.
Aǵashtan ár japyraq qulaǵanda,
Jylaǵym kep turady.
Taǵdyryń ózgermeidi talasqannan,
Esebiń bar, ótkenniń hatyn aqtar.
Ólimdi eske salady, aǵashtardan
Sarǵaiyp, jerge túsken japyraqtar.
Qinaityndai qimastyqtyń álegi,
Tamshy izdep túgesilgen tózimnen.
Sulý emes deme kúzdi
Ádemi!
Kórshi meniń kózimmen!
JAÝAP
...Janarymda jyltyrap, kúmis muńym syrǵanap...
Tilsiz muńyn gúlderdiń tek tún ǵana tyńdamaq.
Nege degen bir suraq qalyp qoidy kókeide,
Oilaryma oi qosyp, muńdaryma muń jamap.
Kiná bolsyn keshpeitin, jylý bolsyn óshpeitin,
Kóńil, shirkin, sonda da tek biikti kókseitin...
Únsizdikten eń ońai jaýabym joq beretin,
Únsizdikten eń aýyr jaýap ta joq estitin.
NAZ
(...ǵa)
Muńǵa oranyp otyrmashy túnerip.
Kúrsinbeshi, kúrsinisińde kún ólip.
Seni súigen muń meni de mazalap
Ekeýimiz de júdedik.
Kirbiń shalǵan kóńildegi muńdy aqtaryp,
Qos janaryń sendegi bar syrdy aqtaryp,
Kúrsinesiń...
Sezbeisiń sol sátterde
Ketetinin janymnyń untaqtalyp.
Bilem, jasandylyqty jek kóresiń.
Jubatarmyn, meili ózgeler ókpeletsin.
Bar muńyńdy umyt ta, jymiia sal
Kóńilim kókke jetsin.
Qazir Kúz. Alǵashqy aiy. Bul ai basy.
Jaz kóńildi kúiretip muńaimashy.
Sen muńaisań eriksiz órt qushamyn.
Meni de bir oilashy!
...bir oilashy...
BILESIZ BE?
Úmitti ylǵi kúdiktiń kúzeterin,
Kei ókinish órt emes, muz ekenin
Bilesiz be, elesi qymbat sáttiń
Kózdegi kadrlardan júz óterin?
Bir úmit myń tilekti quraitynyn,
Barlyǵy óz qalaýyn suraitynyn,
Bilesiz be, shoq qaryp sharasyzdyq
Tamshy bolyp janardan qulaitynyn?
Baqytty adamdar da jylaitynyn,
Jylap júrip, syndarǵa shydaitynyn
Bilesiz be? Men ózi keshteý bildim
Bir jannyń unaitynyn...
Bilemin, onyń jaryq Kún ekenin!
Sezemin, júreginiń jyly ekenin.
Sonda da birdei kórem Muń ekeýin
Sol jannyń, bilesiz be, kim ekenin?
***
Seni ózgerip ketti dedi, senbedim.
Jan ózgertpes senimim eń sen meniń.
Sen týraly bos sózine ózgeniń
Sener bolsam -
Seni tiri kómgenim!
Shyn sezimder bolmaidy dep bógetsiz,
Kei kezderi ketseń daǵy dereksiz,
Gúl usynǵan júrekterdi elemei,
Muń usynǵan seni súidim sebepsiz!
Tuman ishi qansha úmitter kóz ildi.
Sol shaqtardy qaitarsań ǵoi, qaitarsam.
Sen kózimnen oqyp júrgen sezimdi,
Men sózimmen aitar edim, aita alsam.
Jol bólindi. Kimge kiná taǵamyz?
Ári qarai qaida, qalai baramyz?
Sensiresem - sen janymdai jaqynsyń.
Siz dep ketsem, alshaqtaýy aramyz.
Sen sor bolsań, men baqyttan baz keshem!
Tek sen jaily jyr jazamyn jaz deseń.
Bireý saǵan uqsap ketse, unaidy
Sen eshkimge uqsamashy, ózgeshem!
***
Toqtaýsyz syrǵyǵan saǵattyń tilindei,
Tym jyldam jyljyǵan ýaqyt-ai, bilinbei.
Ai-jyldar kózdegi kadrlar ainalǵan.
Oimenen kún ótken keshe de búgindei.
Keshe de kún ótken, ai ótken, jyl ótken.
Jalǵandyq jaýratqan oilardy muń ópken.
Sezimmen kútkende sekýndtar baiaýlap,
Janarlar tózimniń tamshysyn túletken.
Jalǵyz Ai juldyzdar jetektep tún kelgen.
Jan keide jylaidy, janarlar kúlgenmen.
Bilimiń amalda kórinis tappasa,
Qaiyr joq - deýshi edi bir dosym, bilgennen.
Tún túgel taýsylsa, taǵy da tań atpaq.
Qus bitken sairaidy-aý, Qudaidy madaqtap.
Sezimge erem de, sendelem oi ishi
Kózimde tússiz muń, qiialda qala appaq..
Sóndirmei ótsem dep, senimniń shyraǵyn.
Kúdikti kúzetip, úmitpen turamyn.
Ózgeden qate izdeý - bolmysta jat maǵan.
Kináli qashanda ózim bop shyǵamyn...
Kináli ózim dep muńaiyp, jaiqalmai
Ýaqyt ta ótedi, ketedi baiqalmai.
Oi ishinde otyrmyn, oilar tek ol jaily.
Ai ústinde otyrmyn, "keshir" dep aita almai...
SENI IZDEDIM
Tolassyz oi tynshymdy alǵan túnderden,
Tátti qiial terbep ótken tańdardan,
Sulýlyqqa yntyq etken gúlderden,
Sheksizdikke teńeý bolǵan zańǵardan,
Júregimdi nysana etse muń mergen,
Muńlyqsyń dep,
Shyndyqpyn dep san jalǵan
Jaýratqanda
bu dúnie túrlengen
Áldekimge sátterimde aldanǵan,
Áýenine bult bilegen biikten,
Bala armanym meken etken taýlardan,
San ot keship, shala kúigen kúiikten,
Jan saraidyń ishindegi baýlardan,
Qulazýdan,
Qobaljýdan,
Átteńnen,
Oianý, tańdaný men kóz ilýden,
Jyr jazýdan,
Sózge simas sátterden,
Baryńdy barymmenen sezinýden,
Terbelisten,
Tylsymnan,
Tartylystan,
Qajettilik, usynys, suranystan,
Boidaǵy úrei menen qorqynyshtan,
Ǵajaiyptan,
Ǵaiyptan,
Qýanyshtan,
Túńilýden,
Jyǵylý, súrinýden,
Qaita turyp júgirýden,
Armannan,
Syrtyna, ishine de úńilýden,
Jyltyry men jyrtyǵy kóp jalǵannan,
Sanaýly sát súretin shattyǵymnan,
Erte eseigen sábilik suraqtardan,
Júregime quiylǵan tátti muńnan,
Sátterimnen sebepsiz jylap qalǵan,
Ókinishten,
Súisinýden,
Meiirden,
Aqyl-oidyń qiiali san óńinen,
Pendelikten perde tikken peiilden,
Júrektiniń rýhani áleminen,
Sýretterden sanalarda kei ilgen
Jaqsy oilardyń jadtaǵy dáneginen,
Kezderden de oidan kúmán seiilgen,
Erke jeldiń salqyndaý sáleminen,
Tolqyndardan,
Jasyndai jarqyldardan,
Qarapaiym qara jer topyraqtan,
Janyńa azyq bolmas altyndardan,
Kúzdigún júz jylaǵan japyraqtan,
Ǵashyqtyqtan
Ǵasyrlyq ǵazaly bar,
Saǵynyshtan,
Kútýden,
Búkil sertten,
Dáriger ýaqyttan da jazary bar,
Kei keýdede bolatyn tútindi órtten,
Sanaǵa sińip qalǵan senimderden,
Sezimderden aqyldy basqaratyn,
Jarysýdan,
Jeńýden,
Jeńilgennen,
Qimastyqtan janarda jas qalatyn,
Uiattan,
Úmitterden,
Kúdikterden,
Joldarymnan, izderden júrip kelgen,
Jeńildikten,
Qiyndyqtan kúlip jeńgen,
Ǵumyrda jiyrma jyl súrip kelgen
Seni izdedim, Súiiktim!
KÓRGIM KELMEIDI
Óz tilinde sóilei almas balasy,
Mansap qýǵan adam kórgim kelmeidi.
Quldyqtan bir arylmaityn sanasy,
Máńgúrttener qoǵam kórgim kelmeidi.
Bolsa daǵy kóp ǵimarat salynǵan,
Meiirimsiz qala kórgim kelmeidi.
Bir kóre almai, ómir boiy saǵynǵan
Ata-anasyz bala kórgim kelmeidi.
San kúnáǵa sebepshi bop qalatyn,
Arsyz toly kóshe kórgim kelmeidi.
Óz perzentin tastap kete alatyn,
Áke menen sheshe kórgim kelmeidi.
Qarttar úiinde úmitke erip kete almai,
Uiqysyz kútken tańdy kórgim kelmeidi.
Ata-ananyń qadirine jete almai,
Qabirin qushqan jandy kórgim kelmeidi.
Babalardan bizge deiin jalǵasqan,
Saltyn bilmes ulan kórgim kelmeidi.
Oqylmaityn, tórde turyp shań basqan
Beti ashylmas Quran kórgim kelmeidi.
Kóńilińdi tek bir sátke aldaityn,
Úzip, syilar gúl de kórgim kelmeidi.
Balamenen birge kóre almaityn,
Kók jáshikti múlde kórgim kelmeidi.
Jylýy joq, jalǵany kóp sózinen,
Joldas bolmas dosty kórgim kelmeidi.
Bárinen de bóbekterdiń kózinen,
Tasty eriter jasty kórgim kelmeidi.
Ult portaly
