Salmonella taiaqshasy bar taýyq eti elimizdiń birneshe oblysyna tarap ketti. Atalǵan ónimder Resei men Belarýsten jetkizilgen, dep xabarlaidy "Ult aqparat".
QR Densaýlyq saqtaý ministrligi qoǵamdyq densaýlyqty saqtaý komitetiniń tóraǵasy Jandarbek Bekshinniń sózine qaraǵanda, kórshi elden kelgen taýardyń quramynan salmonella taiaqshasy tabyldy.
«Máselen, Aqmola, Soltústik Qazaqstan men Jambyl oblysynda satylǵan Injavensk qus fabrikasynyń ónimderinen salmonella shyqty. Atalǵan kásiporyn Reseide ornalasqan. Al Shyǵys Qazaqstan men Almaty oblysynda «Prioskoleniń» ónimderinen salmonella taiaqshasy tabyldy. Budan bólek, reseilik «FinInvest» kompaniiasynyń sapasyz ónimderi Aqmola men Qostanai oblysynda satyldy. Al Qaraǵandy men Soltústik Qazaqstanda Chebarkýl qus fabrikasynyń ónimderi talapqa sai emes bolyp shyqty», - dedi J.Bekshin búgin «Atameken» UKP-synda ótken kezdesýde.
Onyń aitýynsha, Belarýs jaqtan da sapasyz qus ónimderi kóptep jetkiziledi. Ol taýardyń ishinde Vitebsk broiler qus fabrikasy, Drýjba qus fabrikasy, Servoliýks-Agro, Smolevicha Broiler siiaqty kásiporyndardyń ónimderi bar.
Resmi málimetke sáikes, sońǵy tórt aida qus etine 1 244 ret synama jasaldy. Sonyń 32 protsenti talapqa sai emes bolyp shyqty.
Aita keteiik, búgin Bas sanitarlyq dáriger J.Bekshin otandyq qus eti alýǵa keńes berdi. Sebebi otandyq qus ónimderin eki birdei ministrlik tekseredi. Taýardy óndirý protsesin aýyl sharýashylyǵy ministrligi baqylasa, densaýlyq saqtaý ministrligi daiyn ónimdi tekserip otyrady. "Budan bólek, bizdiń territorialdyq organdarymyz qus fabrikalaryna jii baryp turady. Sonda otandyq ónimder úsh birdei tekseristen ótedi. Alaida importtyq taýardy tek dúkenge túskende ǵana baqylaýǵa alady. Sonyń saldarynan elimizge sapasyz taýarlar jetkiziledi. Bizge Resei men Bedarýstan qus eti kóp keledi. Onyń ishinde sapasyz, tipti adam densaýlyǵyna qaýipti ónimder az emes", - dedi J.Bekshin.
