«Shal» filminde basty róldi somdaǵan akter Erbolat Toǵyzaqov osy kúnge deiin jeke baspanasy bolmaǵandyqtan otbasyn qurmaǵanyn aitty. Onyń sózinshe, qazir zeinetaqysymen páter satyp alý múmkin emes. Bul týraly ol «Ýaqyt kórsetedi» YouTube jobasynda aitty, dep habarlaidy ult.kz.
Akterdiń aitýynsha, jastyq shaǵynda keńestik kezeńde páter alý múmkindigi bolmaǵan, al qazir oǵan qarjylyq jaǵdaiy múmkindik bermeidi.
«Óz aqshama páter alý — oryndalmaityn nárse. Páter buiyrsa eken degen armanym bar. Ózimniń menshikti páterim bolmasa, qalai úilenemin? Osy kúnge deiin nege otbasyn qurmadym, nege páterim joq?», – dedi ol.
Erbolat Toǵyzaqov ózine jeke baspanasy bolmaiynsha úilenbeimin dep sert bergenin jetkizdi. Alaida búginde 78 jasqa kelse de, bul armany oryndalmaǵan.
Ol otbasynyń kezinde Sibirden Qazaqstanǵa kóship kelgenin, uzaq ýaqyt jaldamaly páterde turǵandaryn eske aldy. Ákesi tek 1964 jyly ǵana páter alǵanyn aitty.
«Sol kezde «óz páterim bolmasa, úilenbeimin» dep ózime sóz berdim. Óz qolymmen jaǵdai jasamaiynsha shańyraq qurmaimyn dep sheshtim. Biraq oǵan kúshim jetpedi. Ókinetin eshteńe joq. Kóńilimde júrgen adam áli de bar. Eger jaǵdai bolsa, birge júrer edik», – dedi akter.
Soǵan qaramastan, Erbolat Toǵyzaqov ótken ómirine esh ókinbeitinin, qaita ómirge kelse de dál osy taǵdyrdy tańdaitynyn aitty.
«Men osy ómirime óte rizamyn. Qanshalyqty qiyn bolsa da, bári artta qaldy. Qazir, Qudaiǵa shúkir, bári jaqsy. Tek maǵan qazir kúsh-qýat jetpeidi. Biraq qaita týsam da, osy ómirimdi qaita súrer edim», – dedi ol.
