«شال» فيلمٸندە باستى رٶلدٸ سومداعان اكتەر ەربولات توعىزاقوۆ وسى كٷنگە دەيٸن جەكە باسپاناسى بولماعاندىقتان وتباسىن قۇرماعانىن ايتتى. ونىڭ سٶزٸنشە, قازٸر زەينەتاقىسىمەن پەتەر ساتىپ الۋ مٷمكٸن ەمەس. بۇل تۋرالى ول «ۋاقىت كٶرسەتەدٸ» YouTube جوباسىندا ايتتى, دەپ حابارلايدى ult.kz.
اكتەردٸڭ ايتۋىنشا, جاستىق شاعىندا كەڭەستٸك كەزەڭدە پەتەر الۋ مٷمكٸندٸگٸ بولماعان, ال قازٸر وعان قارجىلىق جاعدايى مٷمكٸندٸك بەرمەيدٸ.
«ٶز اقشاما پەتەر الۋ — ورىندالمايتىن نەرسە. پەتەر بۇيىرسا ەكەن دەگەن ارمانىم بار. ٶزٸمنٸڭ مەنشٸكتٸ پەتەرٸم بولماسا, قالاي ٷيلەنەمٸن? وسى كٷنگە دەيٸن نەگە وتباسىن قۇرمادىم, نەگە پەتەرٸم جوق?», – دەدٸ ول.
ەربولات توعىزاقوۆ ٶزٸنە جەكە باسپاناسى بولمايىنشا ٷيلەنبەيمٸن دەپ سەرت بەرگەنٸن جەتكٸزدٸ. الايدا بٷگٸندە 78 جاسقا كەلسە دە, بۇل ارمانى ورىندالماعان.
ول وتباسىنىڭ كەزٸندە سٸبٸردەن قازاقستانعا كٶشٸپ كەلگەنٸن, ۇزاق ۋاقىت جالدامالى پەتەردە تۇرعاندارىن ەسكە الدى. ەكەسٸ تەك 1964 جىلى عانا پەتەر العانىن ايتتى.
«سول كەزدە «ٶز پەتەرٸم بولماسا, ٷيلەنبەيمٸن» دەپ ٶزٸمە سٶز بەردٸم. ٶز قولىممەن جاعداي جاسامايىنشا شاڭىراق قۇرمايمىن دەپ شەشتٸم. بٸراق وعان كٷشٸم جەتپەدٸ. ٶكٸنەتٸن ەشتەڭە جوق. كٶڭٸلٸمدە جٷرگەن ادام ەلٸ دە بار. ەگەر جاعداي بولسا, بٸرگە جٷرەر ەدٸك», – دەدٸ اكتەر.
سوعان قاراماستان, ەربولات توعىزاقوۆ ٶتكەن ٶمٸرٸنە ەش ٶكٸنبەيتٸنٸن, قايتا ٶمٸرگە كەلسە دە دەل وسى تاعدىردى تاڭدايتىنىن ايتتى.
«مەن وسى ٶمٸرٸمە ٶتە ريزامىن. قانشالىقتى قيىن بولسا دا, بەرٸ ارتتا قالدى. قازٸر, قۇدايعا شٷكٸر, بەرٸ جاقسى. تەك ماعان قازٸر كٷش-قۋات جەتپەيدٸ. بٸراق قايتا تۋسام دا, وسى ٶمٸرٸمدٸ قايتا سٷرەر ەدٸم», – دەدٸ ول.
