Qazirgi tańda «Qazposhtada» avtomatty suryptaý jelisi iske qosylǵan. Ol sálemdemelerdi 12 ese jyldamyraq óńdeýge múmkindik berdi. Bul týraly «Qazposhta» AQ Basqarma tóraǵasy Sáken Sársenov Úkimettiń keńeitilgen otyrysynda málim etti.
Jiyn barysynda Sáken Seitjapparuly elektrondy kommertsiiany, Qazaqstandaǵy onlain-saýdany jáne poshtalyq infraqurylymnyń damý deńgeiin sóz etti.
«3 fýlfilment ortalyǵy men 4 elektrondy kommertsiia ortalyǵy ashyldy. «Raypost» dep atalatyn internet-ekvairing iske qosyldy. Ol tólem kartalaryn qabyldaýǵa jáne elektrondy aqshalar arqyly onlain-tapsyrystar jasaǵan kezde poshtalyq-logistikalyq qyzmetterdi tolyqtai qoldanýǵa arnalǵan», – deidi S.Sársenov.
Onyń sózinshe, el aýmaǵyndaǵy sálemdemeler sýpermarketiniń sany 214-ke jetken. Aldaǵy 1 jylda taǵy 39-y ashylady. Sondai-aq, qazir 151 poshtamat bolsa, jaqyn jyldarda taǵy 200 poshtamat iske qosylady dep josparlanýda.
Bolashaqta atqarylar jobalarǵa keler bolsaq, 2022 jyly Almaty, Nur-Sultan jáne Aqtóbe qalalarynda avtomattandyrylǵan suryptaý mashinalarynyń 3-eýi ornatylady. 2025 jylǵa qarai poshtamattardyń sany 1151-ge deiin jetip, sálemdemeler sýpermarketiniń sany 543-di quraityn bolady.
Jalpy aitqanda ulttyq poshta operatory «Tsifrlyq Qazaqstan» memlekettik baǵdarlamasynyń júzege asýyna óz úlesin qosýda. Atap aitqanda, kompaniia janynan ashylǵan elektrondy kommertsiia ortalyqtarynda onlain qyzmet pen onlain-dúkenderdi ashýdy úiretetin kýrstar ótkizilip turady.
«Qazirgi tańda e-commerce ortalyqtarynda shaǵyn jáne orta biznestiń 1500-den asa ókili oqyp shyqty. Olar internet-dúkenderdi qurýdyń daǵdylaryn úirenip, satý jáne taýardy jyljytýdyń jańa mashyqtaryn meńgerdi. Nátijesinde ózderiniń 57 internet-dúkenin ashty. Al biylǵy jyly 2 myńnan astam biznes ókilderin oqytý kózdelip otyr. Eksport mektebi arqyly shaǵyn jáne orta biznestiń 250 ókili Amazon, AliExpress, Ebay syndy halyqaralyq internet-alańnan bilim aldy», – dep atap ótti Basqarma tóraǵasy.
