Shymkent qalasynyń ákimi Murat Áitenov tanymal ánshi Sáken Maiǵazievtiń mádeniet úiiniń esebinen "Mýzart" kontsertin ótkizýine qatysty pikir bildirdi, dep habarlaidy Sputnik Qazaqstan.
Búgin ortalyq kommýnikatsiialar qyzmetinde ótken onlain brifingte tilshiler "Mýzart" tobynyń kontsertine jumsalǵan qarjy jaiynda surady.
"Naýryz merekesi qarsańynda "Mýzart" kontsertiniń ótkenin bilemiz. Ony ákimdik ótkizdi, naqty aitsaq, qarjyny Shymkent qalalyq mádeniet úii bóldi. Al onyń direktory – Sáken Maiǵaziev. Onyń "Mýzart" tobynda óner kórsetetinin bárimiz jaqsy bilemiz. Toptyń kotsertine ózi basqaryp otyrǵan mekeme arqyly qarjy bólýi qanshalyqty zańdy? Bul jerde múddeler qaqtyǵysy baiqalmai ma?", - dep surady tilshiler.
Shymkent ákiminiń aitýynsha, mádeniet salasynyń qyzmetkerlerine negizgi jalaqysynan bólek qosymsha tabys tabýǵa bolady.
"Birinshiden, Maiǵaziev ol jerden ailyq ári gonorar alsa, bul - basqa másele. Ekinshiden, olardy arnaiy shaqyryp, ózi qosylyp, tegin án aitsa, ol – bólek másele. Úshinshiden, ózińiz jaqsy bilesiz, zańǵa sáikes mádeniet ókiline ekinshi tabys tabýǵa bolady. Ol kitap jaza ma, án aita ma, gonorar retinde alýǵa kedergi joq", - dedi Áitenov.
Osy oraida qala ákimi bárin tekserip, Naýryz meiramyna bólingen qarjy boiynsha arnaiy suhbat berýge ýáde etti.
"Biz Naýryz meiramyna qatysty máselege núkte qoiyp, bárin jariialaimyz", - dep túiindedi qala basshysy.
