Úkimettiń búgingi otyrysynda QR Premer-Ministri Baqytjan Saǵyntaev jekeshelendirýdiń ózekti bir máselesine basa nazar aýdardy. Inventarizatsiia boiynsha satýǵa shyǵarylatyn kásiporyndardyń naqty tizimi jasalsa da, ýaqyt óte kele, jańa nysandar sańyraýqulaqtai kóbeiip ketedi. Sol úshin Ulttyq ekonomika ministri Timýr Súleimenovke búgin eskertý jasaldy, dep habarlaidy QazAqparat.
"Timýr Muratuly, biz inventarizatsiiany ótkizdik. Durys pa? Eki jyldyń qorytyndysy boiynsha naqty kásiporyndardy anyqtadyq. Sodan keiin jańa nysandar quryldy ma?", - dep surady Baqytjan Ábdiruly.
Ulttyq ekonomika ministri Timýr Súleimenovtyń aitýynsha, jalpy tizimge taǵy 168 kásiporyn qosyldy. Úkimet basshysy óz narazylyǵyn taǵy bildirdi.
"Sonda biz inventarizatsiiany ne úshin ótkizdik? Bir qolymyzben qysqartyp otyrmyz, al ekinshi qolymyzben odan da kóp nysandardy quryp aldyq pa? Nege ondai áreketterge jol beremiz? Bir kásiporyndy joiamyz, sonyń ornyna basqasyn jasaimyz. Olai jumysymyz bitpeidi ǵoi", - dedi Premer-Ministr.
Ministr Súleimenov buǵan tushymdy jaýap bere almady. «Naqty anyqtamany keiinirek bersek bolady ma?", - dep surady. Sol úshin Úkimet basshysynan taǵy da syn estidi.
"Timýr Muratuly, búgin siz baiandama jasaý úshin keldińiz. Anyqtamany keiinnen qol astyndaǵy qyzmetkerlerden suramaityndai, bárin basta ustaý kerek. Mine, osynyń saldarynan sizderde jańa kásiporyndar sańyraýqulaqtai qaýlap ketedi. Sebebi eshqandai baqylaý joq. Oilaryna kelgenin isteidi!", - dep shúilikti B.Saǵyntaev.
