Megapolis ákimi Baqytjan Saǵyntaev «Almaty» telearnasyndaǵy Akimat Live baǵdarlamasynyń tikelei efirinde qala turǵyndaryn, ásirese aǵa býyndy COVID-19-qa qarsy vaktsina alýǵa shaqyrdy, dep habarlaidy "Ult aqparat".
Baqytjan Saǵyntaev Almaty qalasy koronavirýs boiynsha «qyzyl» aimaqta ekendigin eske saldy.
«20 sáýirde táýlik ishinde koronavirýs infektsiiasynyń 667 jaǵdaiy tirkeldi, onyń 574-i simptomdy jáne 93-i simptomsyz. Búginde qýattylyǵy 6060 tósek-oryndy quraityn infektsiialyq statsionarlarda 3754 naýqas, onyń ishinde 96 bala bar. Onyń ústine, 920 adamnyń jaǵdaiy aýyr, 2834-i – ortasha aýyrlyqta. Reanimatsiia men qarqyndy terapiia bólimderinde 241 adam emdelýde, ókpeni jasandy jeldetý apparatynda – 23,invazindi emes ÓJJ apparatynda - 94, High flow apparatynda 85 naýqas bar», - deidi ákim.
Meditsina-sanitariialyq alǵashqy kómek mobildi brigadalary men telemeditsina ortalyǵynyń ambýlatoriialyq baqylaýynda 6 021 patsient bar. Onyń ishinde 5301 adamda indet belgileri bar, olar ortasha aýyr jaǵdaida. 720 adamda aýrý belgileri joq.
Sońǵy 7 kún ishinde koronavirýstyń taralý deńgeii 240,8-den 243,9-ǵa deiin ósti, reprodýktivti R sany 1,023-ten 1,031-ge deiin ulǵaidy.
«Sáýir aiynda aýrýdyń boljamdy ósýi jalǵasýda, KVI epidemiiasynyń damý dinamikasy 3 aptanyń pessimistik boljamyna sáikes keledi. 1 sáýirden 20 sáýir aralyǵynda 13 002 KVI jaǵdaiy tirkeldi. Bir jasqa deiingi balalar arasynda indettiń órshýi jalǵasýda 0,5% - 1,3-ten 1,8% -ǵa deiin; 14 jasqa deiingi balalarda - 1% - 9,1-den 10,1% -ǵa deiin; jasóspirimder arasynda - 0,3% - 3,0-den 3,3% -ǵa deiin jáne 60 jastan asqan azamattar arasynda 0,6% - 23,7%-dan 24,3%-ǵa deiin», - dedi Baqytjan Saǵyntaev.
Sonymen qatar, ol densaýlyq saqtaý júiesin modernizatsiialaý men nyǵaitý boiynsha qabyldanǵan sharalardyń arqasynda meditsinalyq mekemelerdiń úlken júktemelerge oidaǵydai tótep bergenderin atap ótti. Alaida, mamandardyń málimeti boiynsha pandemiianyń sharyqtaý shegi áli ótken joq.
«Sondyqtan qala turǵyndary úlken saqtyq tanytyp, sanitarlyq-epidemiologiialyq qaýipsizdik sharalaryn saqtaýlary tiis. Demek, KVI-den saqtanýdyń bir ǵana jol bar, ol – erikti vaktsinalaný. Osy rette Almatyda barlyq jaǵdailar jasalǵan, vaktsinalar partiialary qalaǵa turaqty jetkizilýde, barlyq aýdandarda vaktsinalaý pýnktteri ashylǵan», - dedi qala basshysy.
Almatyda halyqty jappai vaktsinalaý 2 sáýirde bastaldy. 21 sáýirdegi jaǵdai boiynsha barlyǵy 149 699 qala turǵynyna ekpe salyndy, onyń ishinde qalada jumys isteitin Almaty oblysynyń turǵyndary da bar. 23 sáýirde vaktsinanyń 35 myń dozasy, 25 sáýirde 100 myń dozadan astam vaktsina jetkiziledi dep kútilýde.
