Qazaqstan úkimetiniń basshysy Baqytjan Saǵyntaev aldaǵy on jylǵa ázirlengen mal sharýashylyǵyn damytý baǵdarlamasyn júzege asyrýǵa bir kisidei jumylýǵa shaqyrdy, dep habarlaidy Sputnik Qazaqstan tilshisi.
"Aýyl sharýashylyǵynyń damýy qanshalyqty mańyzdy ekenin bárimiz bilemiz. Elbasy óz sózinde ekonomika ósiminiń draiveri aýyl sharýashylyǵy bolýy tiis ekenin aitqan bolatyn. Onyń ishinde mańyzdysy – etti mal sharýashylyǵy. Sol sebepten bul jumysqa barlyǵymyz bir kisidei kúsh salyp, kirisýimiz kerek", — dedi Saǵyntaev úkimet otyrysynda.
Premer-ministr buǵan deiin mal sharýashylyǵy salasynda oryndalmaǵan mindetterdi eske saldy.
"Jasyratyn nesi bar, kezinde biz 2010-2016 jyly 60 myń iri qara mal etin syrtqa eksporttaimyz dep mindetteme alǵan bolatynbyz. Aqyry sol mindet oryndalmady. Ártúrli sebeptermen, árine, qazir ony talqylaýyń qajeti joq. 2016 jyly biz bar bolǵany 6,8 myń tonna et eksporttasaq, 2017 jyly 5 myń tonna iri qara mal eti syrtqa shyqty. Endi qazir Elbasynyń tikelei aralasýymen Qytaiǵa jylqy eti men qoi etin kirgizý boiynsha kedergiler alynyp tastaldy. Arab Ámirligimen de iri qara mal etin satyp alý, kirgizý kedergileri de alynyp tastaldy. Qytaimen iri qara mal eti boiynsha jumys jyl sońyna deiin aiaqtalady. Aldaǵy ýaqytta mal sanyn kóbeitip, ekportqa shyǵarýǵa múmkindikter bar", — dedi úkimet basshysy.
Osy oraida Saǵyntaev búgingi baǵdarlamada josparlanǵan sharalardy iske asyrý úshin memlekettik organdarmen taǵy bir márte pysyqtap alýdy tapsyrdy.
"Úlken tapsyrma, mindet qoiylyp otyr. "Aspandaǵy qusty uiatqa qaldyratyn jerdegi jem" deidi, sol sebepti úlken tapsyrmany oryndaý barysynda Ómirzaq Estaiuly (aýyl sharýashylyǵy ministri – avtor eskertp.), Elbasy men halyqtyń aldynda taǵy da uiatqa qalmaiyq. Baqylaý sizde", — dep tapsyrdy premer.
