Jylý maýsymyna daiyndyq barysy talqylanǵan otyrysta Úkimet basshysy Baqytjan Saǵyntaev Qaraǵandy oblysynyń basshylyǵyna byltyr Shahanda bolǵan jarylystyń biyl qaitalanbaýyn qatań baqylaýǵa alýdy tapsyrdy, dep habarlaidy "Ult aqparat" Sputnik Qazaqstan portalyna siteme jasap.
Qaraǵandy oblysynyń ákimi baiandaǵandai, óńirde jylý maýsymyna daiyndyq aiaqtalýǵa jaqyn.
"16 qazandyq pen 9 týrbinada jóndeý jumystary bitti. Búginde 15 qazandyq pen 7 týrbina jóndelip jatyr. Jylý maýsymyna daiyndyq turaqty baqylaýda", — dep baiandady selektorlyq bailanys arqyly oblys basshysy.
Sondai-aq oblystaǵy avtonomdy jylý júiesi máselesine toqtaldy.
"30 avtonomdy júieniń 18-in jylý maýsymy bastalǵansha shyǵarýdy josparlap otyrmyz. Qazirgi ýaqytta segiz avtonomdy júie boiynsha jumys aiaqtaldy, qalǵan ony jylý júiesi bastalǵansha ornatylady. Onyń ishinde biýdjettik emes qarjyǵa Shahandaǵy barlyq qazandyqtar úilerden shyǵarylady. 12 qazandyq kelesi jyly shyǵarylady. Tótenshe jaǵdaiǵa jol bermeý úshin qazandyqtar tekserildi, turaqty túrde jumysshylardy oqytý júrgiziledi", — dedi ákim.
"Ásirese, Temirtaý qalasyn baqylaýda ustaý kerek. Ótken jylǵy jaǵdai qaitalanbaýy tiis. Shahanda bolǵan oqiǵa da qaitalanbaidy degen úmittemiz", — dedi Baqytjan Saǵyntaev.
Eske sala ketsek, Shahan kentinde 2017 jyly qańtardyń 1-i kúni bolǵan qaiǵyly apat toǵyz kisi — alty eresek adam men úsh balanyń ómirin qidy. Úidiń jertólesinde ornatylǵan jylý qazandyǵy jarylyp, bes qabatty úidiń shetki podezi opyrylyp qulaǵan bolatyn. Tekserý qorytyndysy boiynsha, bes laýazymdy tulǵa «aýyr zardaptarǵa soqtyrǵan qyzmettik áreketsizdikke» qatysty aiyptalls. Olar — Shahan kentiniń ákimi, onyń orynbasary, ákim apparatynyń kommýnaldyq máseleler jónindegi bas mamany, turǵyn-úi kommýnaldyq sharýashylyǵy bólimi basshysynyń mindetin atqarýshy men turǵyn-úi sektorynyń bas mamany.
