Úkimet basshysy Baqytjan Saǵyntaev qarajatty igere almai jatqan ákimdikterge kezekti ret eskertý jasady, dep habarlaidy "Ult aqparat".
«Toǵyz aidyń qorytyndysy boiynsha jalpy ishki ónimniń ósimi 4,1 paiyzdy qurap otyr. Segiz aidyń qorytyndysymen salystyrǵanda óte úlken ózgeris bar. Bul, jumysty alǵa qarai jyljytý boiynsha barlyǵymyzdyń birlese atqarǵan is-áreketterimizdiń nátijesi dep bilemin. Degenmen, áli de rezervterimiz bar. Ony barshamyz kórip-bilip otyrmyz. Qazir Jobalaý keńsesi boiynsha esepter júrip jatyr. Sol esepterdiń negizinde Elbasynyń qoiǵan tapsyrmasyn tolyqqandy oryndaýǵa múmkindikterińiz bar», - dedi Úkimet basshysy.
Baqytjan Saǵyntaev qalǵan kúsh-jigerdi soǵan salý kerektigin eskertti.
«Qalǵan 51 kún - eki aidyń ishinde Elbasynyń tapsyrmasyn tolyq oryndaýymyz qajet. Degenmen, óńdeý ónerkásibine, kiim óndirý, teri óndirisi, metall, tigin, mineraldyq óndiris, farmatsevtika salasynda kóptegen múmkindikterimiz bar. Jyldyń sońyna deiin qajetti jumystardy atqarýymyz qajet», - dedi Úkimet basshysy.
QR Premer-Ministri sóz sońynda bólingen qarjyny igerý máselesi áli de baryn tilge tiek etti.
«Qazir biz biýdjetti qaita qaraý máselesin pysyqtap jatyrmyz. Toǵyz aidyń qorytyndysy boiynsha igerilmegen qarjynyń barlyǵy alynatyny týraly ózderińizge eskertilgen bolatyn. Osy usynystar Qarjy ministri tarapynan berilgen. Biýdjettiń ózgeristeri qaraldy. Erteń Parlamentte ol týraly baiandalatyn bolady. Iaǵni, 9 aidyń nátijesi boiynsha qai ákimdik qarjyny igermedi - sol qarajattardyń bári alynady. Alynǵan qarjy basqa ákimdikter tarapynan jasalǵan usynystarǵa beriledi. Kim igerip jatyr - soǵan beriledi. Kim igermedi - olardyń bárinen alynady. Jyldyń sońyna deiin áli úsh ai bar. Ár aidyń qorytyndysy boiynsha igerilmegen qarjy osylai alynyp otyrady. Álihan Ashanuly (Qarjy ministri - avt.), kimder igermei jatyr - ol máseleni Parlamentke barmai-aq ózimiz sheshetindei múmkindik bolady», - dedi Úkimet basshysy.
Aita keteiik, B.Saǵyntaev osy jyldyń maýsym aiynda bólingen qarajatty igere almai jatqan ministrlikter men ákimdikterge eskertý jasaǵan edi.
Búgingi Úkimet otyrysynda QR Ulttyq ekonomika ministri Timýr Súleimenov osy jyldyń qańtar-qyrkúiek ailarynda áleýmettik-ekonomikalyq damý kórsetkishi boiynsha úzdik nátijege qol jetkizgen óńirlerdi ataǵan bolatyn.
