QR Premer-ministri Baqytjan Saǵyntaev barlyq ákimdikke tabiǵatty qorǵaý jáne orman mekemeleriniń órt sóndirý jáne tehnikalyq jaraqtandyrý deńgeiin arttyrýdy tapsyrdy, dep habarlaidy Sputnik Qazaqstan tilshisi.
Búgin úkimettiń kezekti otyrysynda orman jáne dala órtteriniń aldyn alý jáne olardy joiýǵa daiarlyq máselesi kóterildi. Osy taqyrypqa qatysty ministrlerdiń jasaǵan baiandamasynan keiin Saǵyntaev jergilikti atqarýshy organdarǵa orman mekemelerin materialdyq jáne tehnikalyq jaǵynan qamtamasyz etýdi tapsyrdy.
"Biyl Qazgidromettiń boljamy boiynsha respýblikanyń birqatar oblysynda jaz maýsymynda aýa temperatýrasy normadan joǵary bolady dep boljanýda. Sol sebepti órttiń aldyn alý máselesine erekshe kóńil bólý qajet. Aýyl sharýashylyǵy, investitsiialar jáne damý ministrlikterine, oblystar men Astana, Almaty qalalarynyń ákimdikterine birlesip tabiǵat qorǵaý jáne orman mekemeleriniń órt sóndirý jáne tehnikalyq jaraqtandyrý deńgeiin arttyrý boiynsha sharalar qabyldaýdy tapsyramyn. Jańa baiandamalarda aityldy, oblystarda jumys júrip jatyr, degenmen de tehnikamen qamtamasyz etý deńgeii áli de tómen", — dedi premer-ministr.
Saǵyntaev osy oraida jyl saiyn qymbat kólik minetin jergilikti atqarýshy organdardy synady.
"Biz BAQ betterinen oqyp otyramyz, ákimdikter jyl saiyn qymbat avtokólik satyp alady, al orman, dala órtin sóndirýge, tasqyn sýǵa toitarys berýge qajetti tehnikany alýǵa kelgende aqsha bolmai qalady. Sol sebepti qurmetti áriptester, osy máselege basa nazar aýdarýdy suraimyn. Bastapqyda qajetti qujattardy, qajetti materialdyq-tehnikalyq qamtamasyz etý máselesine kóńil bólińizder. Keiin artyq aqsha qalyp jatsa, qalǵanyn ala jatarsyzdar", — dep keńes berdi úkimet basshysy.
Sondai-aq, premer-ministr ákimdikter men ishki ishki ister ministrligine balalardyń saýyqtyrý lagerleriniń, sanatoriiler men demalys aimaqtarynyń órt qaýipsizdigine basa nazar aýdarýdy tapsyrdy.
"Jaqynda jaz maýsymy bastalady, daiyndyǵymyz joǵary dárejede bolýy kerek. Ishki ister ministrligi múddeli memlekettik organdarmen jáne jergilikti atqarýshy organdarmen birlesip, orman-dala órtterin aldyn alý jáne olardy joiý jónindegi vedomstvoaralyq is-sharalar josparyn sapaly júzege asyrýy tiis", — dep túiindedi Saǵyntaev.
