Búgin Astana ekonomikalyq forýmy aiasyndaǵy Innovatsiialyq sammit barysynda QR Premer-Ministri Baqytjan Saǵyntaev kvazimemlekettik kompaniialarda «dinozavrlar» jumys istep jatqandyǵyn málim etti.
Onyń paiymynsha, bul adamdar kompaniianyń innovatsiialyq jańǵyrýyna kedergi jasap keledi, dep habarlaidy QazAqparat.
«Búginde jumys istep jatqan kvazimemlekettik kásiporyndarda tiisti kásiporyndy jańǵyrtý baǵatynda eshqandai qyzyǵýshylyq pen ynta baiqalmai tur. Sebebi olar turaqty túrde biýdjet tarapynan qoldaýǵa ie bolyp keledi. Eger de qandai da bir másele týyndap jatsa, olar Úkimetke kelip: «Biz kvazimemlekettik kásiporyn bolǵandyqtan, qaramaǵymyzda kóp adam jumys isteidi. Eger de adamdar sanyn qysqartsaq, onda áleýmettik shielenis týyndaidy», dep aitady. Osyndai tásilmen olar bizdi úreilendirýge tyrysady», - dep toqtaldy Úkimet basshysy.
Onyń sózine qaraǵanda, bul rette Úkimetten kvazimemlekettik kásiporyndar biýdjetten qarjy bólýdi surap, olardyń qyzmetine aralaspaýdy alǵa tartady eken. Nátijesinde, atalǵan kásiporyndar tarapynan damý belgileri baiqalmaidy.
«Búgin birneshe ǵalymmen jáne ekonomistpen kezdestim. Olardyń biri jaqsy oi-pikirdi aitty. Innovatsiialardy engizý - ol ońai emes, bul baǵytta erik-jiger bolýy kerek. Sebebi innovatsiialar «dinozavrlar» júrgen jerge keledi. Atap aitqanda, osy «dinozavrdy» alyp tastap, onyń ornyna innovatordyń kelýi - bul Úkimet aldynda turǵan qadam . Al osy kvazimemlekettik sektorlarda «dinozavrlar» otyr. Sondyqtan olardan tazartqannan keiin, maqsat-mindetter iske asyrylady degen oidamyz», - dep toqtaldy B. Saǵyntaev.
Sonymen qatar Úkimet basshysy iri kásiporyndarda damyǵan eldermen salystyrǵanda eńbek ónimdiligi tómen ekenin aita kele, «Sonymen birge olardyń óniminiń satylmai turǵanyn jai ǵana baqylap tura almaimyz. Ónim satylýy úshin olarǵa kómek kórsetý kerek. Osydan kólikke jáne basqa baǵyttarǵa sýbsidiialar bólinedi. Óz kezeginde osy jeńildikterge kásiporyndar da úirenip alady. Bul rette olar «memleketten surap alý múmkindigi bar kezde óz qaltamyzdan shyǵyndanyp qaitemiz» degendi ádetke ala bastaidy. «Mende 20 myń azamat jumys isteidi. Ónim básekege qabiletti bolmaǵandyqtan, adamdardy qysqartýǵa májbúrmin» degen ýájdi alǵa tartady. Árine, biz óz kezegimizde: «Adamdardy qysqartýshy bolma, biz saǵan kómektesemiz. Adamdar jumystaryn jalǵastyryp, jalaqysyn ala bersin» dep aitamyz. Búginde biz qadamdarymyzdy ózgertýdemiz, 2025 jylǵa deiin olar tolyqtai jańǵyrtý sharalaryn iske asyrýy tiis», - dedi Saǵyntaev.
