Qazaqstan Respýblikasynyń Premer-ministri Baqytjan Saǵyntaev "Astana AgroForum 2018" sharasynda et ónimderin sheteldik standartqa səikestendirý kerektigin aitty, dep habarlaidy Baq.kz agenttigi.
"Biz "qazaqpyz, mal baǵyp óskenbiz, maldy bizden artyq eshkim bilmeidi" deimiz. Biraq, bizdiń malymyzdy eshkim almaidy. Nege? Óitkeni, biz jeitin et pen mysaly Qytai jeitin ettiń standarty eki bólek. Mysaly, qazir qys kele jatyr, soǵymdy alaiyq. Soǵymdy biz jaqsylap turyp baǵamyz, kútemiz, qazy bir eli bolsa, "jaramaidy, úsh eli, tórt eli, taban bolsyn" deimiz. Al sol etpen biz syrtqa shyǵamyz ba? Ony eshkim almaidy. Sol sebepti alatyn elderdiń standartyna sai jumys jasaýymyz kerek", - dedi Saǵyntaev.
Úkimet basshysy Argentina, Braziliia men Ýrýgvaidyń Qytaiǵa et eksporttaitynyn aitty. Saǵyntaev Qytaiǵa qoi etiniń Avstraliia men Jańa Zelandiiadan teńiz arqyly keletinin de jetkizdi.
"Məselen, Avstraliia da biz siiaqty memleket. Olardyń halqynyń sany 20 millionnan səl asady. Aýyl sharýashylyǵy bizge uqsas. Bizdiń Avstraliiadan aiyrmashylyǵymyz - bizde teńiz joq. Biraq, bizdiń shekaramyz jaqyn (Qytaimen - avt.). Bizge teńiz arqyly jetkizip kerek emes, shekaradan assaq, suranys bar. Ómirzaq Estaiuly (Shúkeev-AShM ministri-avt.) 8-9 aida 9,5 myń tonna et eksporttaýymyz kerek deidi. Biz buǵan da qýanamyz. Al bizdiń qytailyq əriptes "biz 300 mln importtaimyz" deidi. Bylaisha aitqanda, 9,5 myń tonna degen bir kósheniń jeitin tamaǵy", - dedi Baqytjan Saǵyntaev.
Premer-ministr elimizge utymdy sətti paidalaný kerek deidi. Ol Qytaidyń jaǵalaý jaǵyna ketpei-aq, Sian qalasy ornalasqan Shansi provintsiiasyna deiin qamtamasyz etýge bolady dedi. Osy provintsiiaǵa deiin 400 mln halyq turady eken. Iaǵni, Qazaqstanǵa etpen tolyq qamtamasyz etý úshin batys Qytaidyń ózi jetkilikti.
