Almaty ákimi Baqytjan Saǵyntaev elimizdegi eń iri qalanyń ekologiialyq problemalary qalai sheshilip jatqanyn aityp berdi, dep habarlaidy QazAqparat.
«Almaty qalasynyń ekologiiasy – jurtshylyqty alańdatatyn máseleniń biri. Sol sebepti ol máseleni sheshý úshin birqatar shara qabyldanyp jatyr. Eń úlkeni - JEO-2 kómirden gazǵa aýystyrý, iaǵni jańǵyrtý. Qazan aiynda osy jobany qarjylandyrý máselesi sheshimin tapty. Osy sheshimniń arqasynda JEO-2-niń shyǵaratyn ziiandy qaldyqtary 38 myń tonnadan 6 myń tonnaǵa deiin tómendeidi. Bul endi Almaty qalasynyń aýasyn tazartýǵa úlken septigin tigizedi», - dedi Baqytjan Saǵyntaev Úkimet otyrysynda.
Qala ákiminiń aitýynsha, Almaty qalasynyń mańyndaǵy JEO-3 máselesi boiynsha «Samuryq-Energo» kompaniiasy jumys júrgizip jatyr.
Aldaǵy ýaqytta qarjylandyrý máselesi rettelse, bul da qalanyń ekologiiasyn jaqsartýǵa septigin tigizedi.
«Jeke sektordy gazdandyrý deńgeii - qala boiynsha 99 paiyz. 1800-dei úi áli gazben qamtamasyz etilmegen. Onyń kóbinde magistraldy qubyrlary joq. Biz «Halyq bankpen» kelistik. Ol bank gazben qamtamasyz etilmegen turǵyndarǵa 0 paiyzben bir jarym jylǵa nesie beredi. Al turmysy nashar otbasylarǵa ákimdik demeýshilerdi tarta otyryp, bul jumysty aiaqtaimyz», - dedi ol.
Baqytjan Saǵyntaev sonymen qatar Talǵar, Ile, Qarasai aýdandarynda 80 myńdai úi áli de gaz qosylmaǵanyn aityp ótti.
«Ministrliktiń qoldaýymen qarjy bólinse, onda osy Almaty úshin kóp kómek bolar edi. Óitkeni biz qalany tazalaǵanymen JEO-3 bar, qala shetindegi 80 myń úi bar – báribir shyǵǵaryndylardyń bári qalaǵa kelip jatyr», - dedi ol.
Baqytjan Saǵyntaev Almaty qalasynda 530 myń kólik tirkelgenimen, kúndelikti qalaǵa kiretin kólik 250 myń ekenin aitady.
Sondyqtan Almatynyń kóliktik strategiiasyn damytý maqsatynda negizgi nazar qoǵamdyq kólikke aýystyrý máselesine aýdarylyp jatyr.
