Baqytjan Saǵyntaev Almaty qalasyndaǵy atystan qaza tapqandardyń jaqyndaryna kóńil aitty, dep habarlaidy "Ult aqparat".
«Alataý aýdanynda bolǵan qaiǵyly oqiǵadan qaza tapqandardyń otbasylaryna qaiǵyryp kóńil aitamyn. Barlyq tiisti kómek pen qoldaý kórsetiledi» - dep jazdy qala basshysy óziniń Twitter-degi paraqshasynda.
Eske salaiyq, búgin, shamamen saǵat 17:00-de Alataý aýdanyndaǵy Aqbulaq móltekaýdanyndaǵy turǵyn úilerdiń biriniń 1967 jylǵy turǵyny atys shyǵarǵan. Ol ańshy qarýymen sot oryndaýshysyna, politsiianyń ýchaskelik inspektorlaryna jáne aýlada bolǵan basqa adamdarǵa qarýdan oq jaýdyrǵan. Nátijesinde bes adam qaitys boldy.
Qaza bolǵandardyń ishinde 1982 jylǵy maior jáne 1988 jylǵy kapitan, sonymen qatar sot oryndaýshysy jáne daý nysany bolǵan úidiń jańa iesi bar. Almaty TJD málimetinshe, departament qyzmetkerleri zardap shekpedi.
Quqyq qorǵaý organdary QR Qylmystyq kodeksiniń 99-babynyń 2-bóligi boiynsha is qozǵazǵan. Bul qylmysty jasaǵandar 20 jylǵa nemese ómir boiyna bas bostandyǵynan aiyrylady. Kúdiktini arnaiy qyzmet ókilderi oqiǵa ornynda qarý qoldanbai ustaǵan, óitkeni úide áielder men balalar bolǵan.
