Almaty ákimi Baqytjan Saǵyntaev qala turǵyndaryn óz aýdanynyń kórkeiýine belsendi at salysýǵa shaqyrdy, dep habarlaidy "Ult aqparat".
Qala ákimi Baqytjan Saǵyntaev Instagram-daǵy paraqshasynda jańarǵan aýlalar men jaiaý júrginshi aimaqtarynyń qoǵamdyq keńistik ajaryn asha túskenin aitty.
«Aýdanǵa jasaǵan jumys sapary kezinde aýmaqtardy ózgertýge keshendi túrde qarap, shań-tozań bolmaý úshin barlyq bos ýchaskelerdi barynsha kógaldandyrýdy tapsyrdym. Biyl aýdanda 205 aýla, 9 skver jóndelip, 5 bos ýchaske, 2 jaǵalaý aimaǵy abattandyryldy. №10 yqshamaýdandaǵy jaiaý júrginshiler aimaǵy jóndelip jatyr», - dep jazdy Almaty ákimi.
Qala ákimi bul jumystardyń barlyǵy turǵyndarmen ótken esep berý kezdesýinde aitylǵan ótinishter boiynsha jasalǵanyn atap ótti.
«Adamdardyń kóńil-kúiiniń qalai jaqsaryp jatqanyn baiqaý qiyn emes. Yqshamaýdandar ómir súrýge yńǵaily bolyp túrlendi. Yńǵaily oryndyqtar, oiyndarǵa arnalǵan ústelder, balalar alańdary turǵyndarǵa uzaq qyzmet eteri sózsiz», - dedi ol.
B. Saǵyntaev qala turǵyndary burynǵysha ózderi turatyn jerdi abattandyryp, gúlder men aǵashtar otyrǵyzýdy qolǵa alsa degen usynysyn bildirdi.
«Tártipti saqtap, balalarymyzǵa qalamyzǵa uqypty qaraýdyń úlgisin kórseteiik», - dedi megapolis ákimi.
