Almatyda aldaǵy eki jyl ishinde jiyny 13 myń orynǵa arnalǵan birneshe mektep ashylady. OKQ-da ótken baspasóz máslihatynda Almaty qalasynyń ákimi Baqytjan Saǵyntaev osylai málim etti, dep habarlaidy QazAqparat.
«Mektep boiynsha problema bar. Bir synypta 40 oqýshydan otyrǵandar da bar. Dese de, jaǵdaidy jaqsartý máselesin memlekettik-jekemshelik áriptestik arqyly sheship, tiisti modeldi ázirlep, investorlardyń qoldaýymen defitsitti joiamyz degen oidamyn», - dedi ákim tilshilerdiń suraǵyna jaýap bere otyryp.
Baqytjan Saǵyntaev QR Prezidenti Qasym-Jomart Toqaevtyń mektepter men balabaqshalardaǵy oryn tapshylyǵy problemalaryn sheshý jóninde bergen tapsyrmasynyń qalai júzege asatyny týraly tolyǵyraq baiandamasynda da aitty.
«Búgingi kúni Almaty mektepterindegi oryn tapshylyǵy 30 myńdy quraidy. Balabaqshalarda oryn tapshylyǵy — 20 myńnan astam. Bul problemalardy sheshý úshin memlekettik-jekeshelik áriptestik qaǵidasy boiynsha mektepter salý baǵdarlamasy ázirlendi. Taiaý aradaǵy eki jyl ishinde shamamen 13 myń oryndy segiz mektep salynady», — dedi qala ákimi.
Ákimniń aitýynsha, 2020 jyldyń basynda 790 oryndy bes balabaqsha paidalanýǵa beriledi. Jańa oqý jylynda 1 800 oryndy eki mektep jáne burynnan bar mektepterdiń janynan 2 017 oryndyq bes qosalqy nysan iske qosylady.
Budan ózge, bul iske memlekettik bilim berý tapsyrysyn ornalastyrý jolymen jeke biznes tartylýda. 2020-2022 jyldary jeke investitsiialyq esebinen 2 240 oryndy tórt mektepti, 8 000 oryndy 300 balabaqshany ashý josparlanyp otyr.
«Osylaisha atalǵan sharalar eki aýysymda bilim alatyn mektepterdegi tapshylyqty 30 myń orynǵa qysqartady. Sonymen qatar, balabaqsha kezegin 10 myń orynǵa azaitady», — dep atap ótti Almaty ákimi.
