Demalys kúnderi aiaz ben qardyń báseńdeýine sebep bolǵan tsiklon yǵysyp jatyr. Onyń ornyna sýyqtyń kezekti tolqynyn ákeletin antitsiklon qaita oraldy. Bul týraly "Qazgidromet" RMK jetekshi injener-sinoptigi Zaina Saǵyndyqova aitty, dep habarlaidy "Ult aqparat" sputniknews.kz agenttigine silteme jasap.
"Temperatýra az ǵana jáne qysqa merzim ishinde tómendeidi. Eger ótken aptada aýa temperatýrasy normadan 15-22 gradýsqa tómen bolsa, aldaǵy úsh táýlikte ol normadan 2-4 gradýsqa tómendeidi. Batys oblystarda temperatýra burynǵysynsha normadan 3-8 gradýsqa joǵary bolady", — dedi Saǵyndyqova.
Al búgin atmosferalyq fronttardyń ótýine bailanysty Qazaqstannyń basym bóliginde qar jaýyp, burqasyndatady, tek ońtústikte, soltústikte jáne soltústik-batysta aýa raiy jaýyn-shashynsyz bolady. Respýblikanyń kei jerlerinde tuman túsip, kóktaiǵaq bolyp, jel kúsheiedi, burqasyndatady.
Almaty oblysynyń kei jerlerinde tuman túsip, Jalańashkól aýmaǵynda jel 18-23 m/s kúsheiedi.
Jambyl jáne Mańǵystaý oblystarynyń kei jerlerinde tuman túsip, kóktaiǵaq bolady, jel 15-23 m/s kúsheiedi.
Batys Qazaqstan oblysynyń kei jerlerinde burqasyndatyp, kóktaiǵaq bolady, túnde jel 15-20 m/s kúsheiedi.
Atyraý oblysynyń kei jerinde tuman, kóktaiǵaq bolyp, túnde jel kúsheiedi – 18 m/s.
Shyǵys Qazaqstan oblysynyń kei jerlerinde jel 15-20 m/s kúsheiip, burqasyndatady.
Aqmola, Qyzylorda, Aqtóbe, Qostanai, Soltústik Qazaqstan, Pavlodar jáne Qaraǵandy oblystarynyń kei jerlerinde tuman túsedi dep boljanyp otyr.
